“Azəriqaz” rəsmi izahat verməlidir - ETİRAZ


Əhali qaz sayğaclarından və sayğacların tez-tez dəyişdirilməsindən narazıdır. 2012-ci ildə “Azəriqaz” kart ödəniş sisteminə keçdi və mexaniki qaz sayğacları smart tipli sayğaclarla əvəzləndi. Üstəlik, bu smart tipli sayğaclar da bir müddət sonra yeniləri ilə əvəzləndi və yeni sayğacların daha üstün olduğu iddia edildi.

O zamandan da əhali sayğacların qarşısında əsir qalıb. Təbii qazın verilməsi dayandımı, qonum-qonşu, tanış-biliş axışır küçəyə ki, kim sayğacı “kod”dan çıxarmağı bacarır, irəli çıxsın. Axşama qədər, bəzən gecəyə qədər sayğacları “kod”dan çıxarmaqla məşğul olurlar. Hələ də kimsə bunun cavabını tapmayıb ki, sayğacların koda düşməsi nə olan işdi və niyə baş verir?

Koddan çıxarmaq üçün mütləq sayğaca azı 1-2 manat yenidən yükləməlisən, hətta sayğacda balans varsa da. Bəzən qazın verilişi gecə saatlarında bərpa edilir, vətəndaş qalır çarəsiz ki, gecə vaxtı qaz kartının balansını harada artırsın? Belə əcaib sayğaclarımız var. İndi isə xəbər yayılıb ki, smart tipli sayğaclar artıq köhnəlib, işə yaramır, onları bu dəfə mexaniki sayğaclarla əvəzləyəcəyik.

Yəni anlaşılan, irəli getmək əvəzinə, geri gedirik. Köhnəyə qayıdırıq. Əhalınin əsas narazılığı həm də mexaniki sayğacların qaz sərfiyyatını əslində istifadə olunandan artıq göstərməsidir.

Bununla bağlı Azərbaycan İnternet Forumunun prezidenti Osman Gündüz feysbuk səhifəsində paylaşım edərək əhalinin ötən ilin bu dövrü ilə müqayisədə hazırda təbii qazın sərfiyyatına görə ikiqat borc yazıldığından şikayət etdiyini yazıb.

“Azəriqaz” narazılıqları nəzərə alaraq bu gündən (26 yanvar 2021-ci il) vətəndaşların müraciətlərinə baxılması məqsədilə “Açıq qapı” günləri elan edib. “Azəriqaz”ın müraciətində bildirilir ki, son vaxtlar əhali abonent qrupunun istifadəsində olan, dövlət yoxlama müddəti çatmış smart-kart tipli sayğacların mexaniki-elektron sayğaclarla əvəz edilməsindən sonra guya yeni quraşdırılan qurğuların təbii qazın sərfiyyatını çox qeydiyyata alması barədə fikirlər dolaşır. Bunları nəzərə alaraq “Azəriqaz” İstehsalat Birliyi bu həftədən başlamaqla hər həftənin 2 və 4-cü günləri Birliyin Metrologiya Departamentində saat 14:00-dan 17:00-dək “Açıq qapı” günləri elan edib. 26 yanvar 2021-ci il tarixdə qeyd olunan saatda Birliyin Metrologiya Departamentində (Ünvan: Bakı şəhəri, Nizami rayonu Oqtay Vəliyev küçəsi 72) media və ictimaiyyət nümayəndələri, həmçinin abonentlərimiz təbii qaz sayğaclarının yoxlama mərhələlərini əyani şəkildə izləyə biləcəklər. Və “Açıq qapı” günü pandemiya qaydalarının tələblərinə uyğun həyata keçiriləcək.

Neftçilərin Hüquqlarını Müdafiə Komitəsinin sədri, hüquq müdafiəçisi Mirvari Qəhrəmanlı “Şərq”ə açıqlamasında qeyd etdi ki, əvvəla smart tipli sayğacların təkrar mexaniki sayğaclarla əvəzlənməsi yanlışdır:

- Belə bir əvəzləmə düzgün deyil. “Azəriqaz” bunun səbəbini açıqlamalıdır ki, 2012-ci ildə baha qiymətə alınıb ölkəyə gətirilən smart-tipli sayğaclar niyə mexaniki-elektron sayğaclarla əvəzlənir? Əhali niyə narazıdır?

Burda müəmmalar var. Ya yeni mexaniki sayğacların iş funksiyasında problem var, defektli sayğaclardır, Azərbaycana göndəriblər, ya da “Azəriqaz” defektli sayğaclar alıb, yaxud da qazın təzyiqi artırılıb ki, sayğac sürətlə fırlanır, yaxud qaz tərkibində hava var.

Nəsə problem var ki, əhali narazılıq edir. Hardan, hansı şirkətdən, hansı müəssisədən alınıbsa bu sayğaclar, onlar bu məsələyə aydınlıq gətirməlidir, rəsmi qaydada izah verməlidirlər. Bir də bilməliyik ki, problem sayğacdadır, yoxsa “Azəriqaz”da.
Tarix: 27-01-2021, 09:21
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı