İsmayıllıya və Neftçalaya yeni təyin olunan gənc icra başçılarının işləri heç düz gətirmir. Əvvəlcə İsmayıllının İH rəhbəri Nahid Bağırov karantin rejimini pozduğuna görə prezident tərəfindən töhmət aldı, ardınca Neftçaladakı həmkarı Mirhəsən Seyidovun vəziyyəti ürəkaçan deyil.
Reportyor.info xəbər verir ki, M.Seyidovin siftəsi hələ prezident onunla N.Bağırovu qəbul edərkən korlanmışdı.
Belə ki, dövlət başçısı ona irad tutaraq “O səndən böyükdür, keç o biri tərəfdə otur” deməklə M.Seyidovu utandırmışdı, böyük – kiçik yeri bilməyə çağırmışdı. Bundan sonra gənc İH başçısının fəaliyyət göstərməsinin, Neftçalada baş çıxarmasının çətin olacağı bilinirdi.
Buyurun, artıq rayondakı köhnə bürokratlar, rüşvətxor məmurlarla baş çıxara bilmir, ötkəm danışa, hökmlü davranmağı bacarmır.
M.Seyidov bir il ərzində özünü təsdiqləyə, etimadı doğrulda bilməsə prezidentin onunla uzun müddət işləyəcəyi ağlabatan görünmür.
Aydın məsələdir ki, kifayət qədər gəncdir, təcrübəsizdir, idarəçilikdə öyrənə-öyrənə inkişaf edə bilər, kurator tərəfindən nəzarət var. Lakin yenə də M.Seyidovun şəxsi rəhbərlik keyfiyyətlərindən də çox şey asılı olacaq.
Gələn məlumatlar isə onun Neftçaladakı mövqeyinin yetərincə zəif olduğunu deməyə əsas verir. Bu haqda jurnalist Qənimət Zahid yazıb.
Onun iddialarına görə, Neftçalada keçmiş baş həkimin həyətindəki ot tayasının altından iki ədəd təcili yardım maşını çıxarılıb.
Jurnalist qeyd edir ki, keçmiş baş həkimin evində isə onlarla plazma televizor aşkarlanıb.
Ehtimal edilir ki, həmin televizorlar xəstəxanadakı palatalar üçün nəzərdə tutulub. Baş həkim isə onları satıb başdan eləmək istəyib. Q.Zahid qeyd edir ki, yeni baş həkim də sələfinin izi ilə addımlayır.
Məlumatlara görə, koronavirusla bağlı müalicə prosesində bilavasitə iştirak edən həkimlərə maaş yazılmayıb, əvəzində bu prosesdə olmayan tibb personalına əlavə əmək haqqı və mükafat hesablayıb paylayıblar.
Baş həkim onlara deyibmiş ki, hər kəs aldığı puldan 200 manat ona verməlidir. Amma hamı pulu alıb aradan çıxıb.
Jurnalistin iddialarına görə, maaş ala bilməyən həkimlər DTX-nın yerli şöbəsinə müraciət ediblər. Oradan isə deyiblər ki, baş idarəyə müraciət emək lazımdır.
Bütün bu hadisələrdən Neftçalanın gənc icra başçısı çaşqın vəziyyətdədir. M.Seyidov təzə və məhdud çevrədə deyibmiş ki, “işləyə bilmirəm, deyəsən, istefa verib getməli olacağam”.
İndi bu söz məhdud çevrədən çıxaraq bütün rayona yayılıb və Neftçalada hamı gözləyir ki, gənc məmur nə zaman aradan çıxacaq.
Hətta Neftçalada pandemiya mövsümündə 160 min manatın mənimsənildiyi iddiaları dolaşmaqdadır. Bu xəbərləri “facebook”da yazan Q.Zahid mənimsəmə ilə bağlı əlavə məlumat verməyib.
Həftənin qeyri-iş günü olduğuna görə Neftçala İH-dən iddialarla bağlı rəsmi münasibət örənmək mümkün olmayıb. 

İcra başçısının və İH-nin açıqlamasını, iddialara aydınlıq gətirməsini işıqlandırmağa hazırıq.