Ukrayna münaqişəsi heç nəyə baxmayaraq həll olunacaq – Vaşinqton administrasiyası

Beynəlxalq ictimaiyyətdə mövcud şübhələrə və tənqidlərə baxmayaraq, Ukraynadakı böhran həll olunacaq.

Musavat.com xəbər verir ki, bunu Ağ Evin sözçüsü Kerolin Levitt jurnalistlər üçün brifinq zamanı deyib.

O, Donald Trampın Ukraynadakı münaqişənin həlli üçün yeni planı dəstəklədiyini vurğulayıb. Levitt Tramp komandasının Yaxın Şərq münaqişəsinin həllində qazandığı uğurları misal göstərib: "Biz inanırıq ki, bu, Rusiya və Ukrayna ilə mümkündür və biz buna nail olmaq üçün ümidliyik və çox çalışırıq".

Levitt qeyd edib ki, ABŞ Ukrayna münaqişəsində hər iki tərəflə işləyir, danışıqlar davam edir və yaxşı bir plan təklif olunub. Ağ Ev Ukrayna nizamlanma planının birtərəfli ərazi güzəştləri kimi başa düşülməsini yanlış təsəvvür hesab edir.

Ağ Ev sözçüsü bildirib ki, Stiv Vitkoff və Marko Rubio ötən həftə yeni nizamlanma planını müzakirə etmək üçün Ukrayna nümayəndələri ilə görüşüblər.

Levitt Ukrayna prezidenti Volodimir Zelenskinin ABŞ ordusunun katibi Driskoll ilə görüşünü təsdiqləyib və Vaşinqton administrasiyasının onun nəticəsi ilə bağlı nikbinliyini bildirib.