“Rus qoşunları hücum əməliyyatlarını davam etdirəcək”
Rusiya “xüsusi hərbi əməliyyatı”, yəni Ukraynaya qarşı müharibəni davam etdirəcək. AYNA.AZ xəbər verir ki, bu barədə şənbə günü Rusiya Silahlı Qüvvələrinin Baş Qərargah rəisi Valeri Gerasimov bildirib. Onun çıxışı Müdafiə Nazirliyi tərəfindən dərc olunub.
Gerasimov qeyd edib ki, rus qoşunları hücum əməliyyatlarını davam etdirəcək. Müdafiə Nazirliyinin məlumatına görə, general “2025-ci ilin yaz-yay kampaniyasına yekun vurub və qoşun qruplarının qarşıda duran vəzifələri dəqiqləşdirib”. Gerasimovun özü deyib ki, “payız dövrü üçün” vəzifələr müəyyənləşəcək.
Generalın sözlərinə görə, strateji təşəbbüs indi bütünlüklə Rusiya qoşunlarındadır. O, yay hücumu zamanı əhəmiyyətli əraziləri ələ keçirə bilməmələrini Ukrayna qoşunlarının böyük itkilər hesabına onları geridə saxlaması ilə izah edib. O rus qoşunlarının itkiləri barədə heç nə deməyib.
Gerasimovun sözlərinə görə, hazırda Rusiya ordusu Ukraynanın Luqansk ərazisinin 99,7%-nə, Donetskin 79%-nə, Zaporojyenin 74%-nə və Xerson vilayətlərinin 76%-nə nəzarət edir. Bu rəqəmlər ümumiyyətlə müstəqil hesablamalara yaxındır (Gerasimovun Donetsk üzrə rəqəmləri bir qədər yüksəkdir). Bundan əlavə, Baş Qərargah rəisi Rusiya qoşunlarının Sumı və Dnepropetrovsk vilayətlərində bir sıra yaşayış məntəqələrinə nəzarət etdiyini xatırladıb.
Rusiya qoşunları cəbhənin bir sıra bölmələrində irəliləyir və yeni əraziləri ələ keçirir, lakin irəliləyiş tempi aşağıdır — söhbət ayda onlarla və ya yüzlərlə kvadrat kilometrdən gedir ki, bu da Ukrayna ərazisinin onda biri və ya yüzdə biri qədərdir.
Rusiya Baş Qərargahının rəhbəri bu həftə Ukraynaya, xüsusən də avqustun 28-nə keçən gecə Kiyevə endirilən zərbələri də şərh edib. Onun sözlərinə görə, müdafiə sənayesi obyektlərinə və hərbi aerodromlara hücum edilib. Xüsusilə, Kiyevə hücumda 5 mərtəbəli yaşayış binası dağıdılıb, 25 nəfər həlak olub.
Valeri Gerasimov nadir hallarda ictimaiyyət qarşısında çıxış edir. Onun müharibənin gedişatı ilə bağlı hazırkı qiymətləndirmələri və davam edəcəyi ilə bağlı sözləri ABŞ Prezidenti Donald Tramp administrasiyasının xüsusilə də nail olmağa çalışdığı mümkün sülh nizamlanmasının müzakirələri fonunda edilib. Rusiya ABŞ-ın təşəbbüsü ilə Ukraynanın təklif etdiyi ilkin şərt olmadan atəşkəsdən imtina edib və Rusiyanın sülh sazişi ilə bağlı tələblərinə digər məsələlərlə yanaşı, ərazi güzəştləri, Ukraynanın NATO-ya üzv olmaqdan imtinası və qanunvericilikdə dəyişikliklər daxildir.
