Hurriyyet.org xəbər verir ki, Amerikanın “Neşnl İnterest” (The National Interest) jurnalında Türkiyənin müdafiə sənayesinin mühüm bir hissəsinə çevrilmiş pilotsuz uçuş aparatlarının hərbi əməliyyatlardakı uğurlarından bəhs edilib. “İsraili unut, Türkiyə Yaxın Şərqin ən böyük PUA qüvvəsi olmaq istəyir” başlıqlı məqalədə Türkiyə dronlarının Suriyadakı böyük uğurlarından bəhs edilib.
Məqalədə Türkiyənin dronlarının Suriyada Rusiya istehsalı olan bir çox hava hücumundan müdafiə sistemini məhv etdikləri vurğulanır, digər hədəfləri vurmaqda da “mübahisəsiz” qabiliyyət nümayiş etdirdikləri qeyd edilir.
Məqalədə deyilir: “Türkiyə müdafiə sənayesinə qoyduğu sərmayənin bəhrəsini görməkdədir”.
Məqalədə ABŞ hərbi müəssisələri ilə Türkiyənin “Roketsan” şirkətinin dronlar üçün istehsal elədiyi avadanlıqlar müqayisə edilib.
Türkiyə istehsalı olan smart (ağıllı) texnikanın Amerika rəqibinin əksinə, dronlar üçün analoq sistemdən alınaraq, mühüm dərəcədə yeniləndiyi bildirilir: “Bu, Türkiyənin analoq sistemləri sürətli şəkildə modern sistemlərə çevirə bilməsinin və bundan əvvəlki texnologiyalara uyğunlaşdırmağı bacarmasının isbatıdır”.