Lüstrasiya uğrunda hərəkat

Xaqani Cəfərli
Lüstrasiya prosesi ağır, lənk şəkildə olsa da postsovet məkanında yeni əraziləri əhatə etməkdədir. Moldova prezidenti xanım Mayya Sandu “Kommersant” qəzetinə müsahibəsində bəyan edib ki, yeni seçilmiş parlamentin ilk işi məhkəmə və prokurorluq sistemini korrupsionerlərdən təmizləyəcək qanunun qəbul edilməsi olacaq. Xanım prezidentin lideri olduğu “Fəaliyyət və həmrəylik” Partiyası ( Partidul «Acțiune și Solidaritate», PAS) parlamentin ilk iclasında belə bir qanunvericilik aktının qəbul edilməsi təşəbbüsü ilə çıxış edəcək. PAS-ın parlamentdə çoxluğa sahib olması qanunun qəbul edilməsində problem olmaycağını deməyə əsas verir. Parlament qanunu qəbul edən kimi prezident də dərhal onu imzalayacaq. Bu isə daha bir postsovet respublikasında Lüstrasiya prosesinin başlanması demək olacaq. Mayya Sandu Lüstrasiya prosesinin bütün sahələri əhatə edəcəyini, ancaq prosesin məhkəmə və prokurorluq sisteminin korrupsionerlərdən təmizlənməsi ilə başlayacağını bəyan edib. Bu isə təsadüfi deyil. Bütün ekspertlər bildirirlər ki, Lüstrasiyanın uğurlu olması üçün proses məhz məhkəmə sistemindən başlamalıdır.
Təəssüf ki, Azərbaycan cəmiyyətində Lüstrasiya ilə bağlı məlumatsızlıq mövcuddur. Eyni zamanda cəmiyyət Lüstrasiya keçirmədən sosial ədalətin təmin edildiyi dövlət qura bilməyəcəyini hələ də tam dərk etmir. Ayrı-ayrı məmurların həbsi, hətta məmurların kütləvi həbsi də Lüstrasiyanı əvəz edə bilməz.
Korrupsiyanın kökünün kəsilməsini istəyiriksə hökmən Lüstrasiya keçirilməlidir. Bunun üçün ilk öncə cəmiyyət bu prosesə hazırlanmalıdır. Cəmiyyəti bu prosesə hazırlamaq üçün isə “Lüstrasiya uğrunda hərəkat” yaradılmalıdır. Bu hərəkat siyasi hakimiyyət uğrunda mübarizə aparmamalı, cəmiyyəti maarifləndirməli, onu Lüstrasiyanın zəruriliyinə inandırmalıdır. Cəmiyyəti bu posesə hazırlamadan Lüstrasiya keçirmək ağrılı ola bilər. Onu da nəzərə almaq lazımdır ki, bu proses nə qədər gec keçirilirsə, bir o qədər ağrılı olacaq.
P.S. Diqqətinizə təqdim olunan fotolar keçmiş sovet respublikalarında Lüstrasiya uğrunda mübarizənin hərəkata çevrilməsini əks etdirir.

---