2018-ci ildə Avropa Şurasında bir qrup Avropa deputatının Azərbaycan tərəfindən rüşvətlə ələ alınması faktları ətrafında qalmaqal yaranıb (“Azərbaycan laundromatı”). Onlar arasında almaniyalı deputatlar da var idi. Almaniya hakimiyyəti bu işin hallarını araşdırmaq üçün nə edib? Bu sual aprelin 20-də Avropa Şurası Parlament Assambleyasının sessiyasında Almaniya kansleri Angela Merkelə verilib.
“Azərbaycanla bağlı qalmaqal Bundestaqda araşdırılıb. Bu, çox xoşagəlməz hadisədir və ətraflı araşdırma tələb edir. Deputatlar Ştrents və Lintner cəzalandırılıblar. Biz bütün sənədləri tədqiq etmişik və qalmaqala cəlb olunmuş bütün ictimai fiqurlar tənqid edilib,” deyə Merkel İslandiyalı deputat, Azərbaycanda siyasi məhbuslar üzrə məruzəçi Torhildur Sunna Evarsdottirin (Thorhildur Sunna ÆVARSDÓTTIR) sualına cavabda bildirib.
2019-cu ilin martında Avropa Şurası Parlament Assambleyasının hüquqi məsələlər və insan hüquqları Komitəsi “Laundromatlar: mütəşəkkil cinayətkarlığa, korrupsiya və çirkli pulların yuyulmasına qarşı beynəlxalq mübarizədə yeni çağırışlara cavab” adlı tövsiyələrin də yer aldığı yeni hesabat dərc edib.
2019-cu ilin yanvarında Bundestaq rəhbərliyi deputat Karin Ştrentsi Azərbaycandan əldə edilmiş xarici gəlirlərin bəyan edilməsinə dair parlament qaydalarını pozduğuna görə cəzalandırıb. 2020-ci ilin yanvarında Frankfurt prokurorluğu Karin Ştrents və Xristian Demokratlar Partiyasının keçmiş üzvü Eduard Lintner barəsində araşdırmaya başlayıb.
Ştrents deputat toxunulmazlığından məhrum edilib, polis isə onun evində axtarış aparıb.
Amerikanın səsi

---