Bu gün Azərbaycanda hakim Yeni Azərbaycan Partiyasının növbədənkənar VII qurultayı keçirilib.

Prezident İlham Əliyev yenidən partiyanın sədri seçilib.

Yerli mətbuat yazır ki, partiyanın Siyasi Şurası ləğv olunub, 40 nəfərdən ibarət İdarə Heyəti, 13 nəfərdən ibarət Nəzarət Təftiş Komissiyası və 35 nəfərdən ibarət Veteranlar Şurası yaradılıb. Arif Rəhimzadə Veteranlar Şurasının sədri seçilib.

Bu qurultay həm də YAP sədrinin I müavini postunun yaradılması ilə yadda qaldı. YAP sədrinin I müavini postuna Prezident İlham Əliyevin əmri ilə Azərbaycanın I vitse-prezidenti Mehriban Əliyeva təyin olunub.

Turan İnformasiya Agentliyinin rəhbəri, siyasi təhlilçi Mehman Əliyev hesab edir ki, YAP-ın ictimai-siyasi partiya kimi təsiri yoxdur, o sadəcə hakimiyyətin maraqlarını təmin edir və ictimai qurum kimi hakimiyyətə lazımdır.

O deyir ki, YAP-dan seçkilərə getmək və seçkidə iştirak etmək üçün istifadə olunur…

"Onun üzvləri formaldır. Səsləri eşidilmir. Onlarla məsləhətləşmələr aparılmır," - cənab Əliyev deyir.

Yeni Azərbaycan Partiyasını Sovet İttifqının Kommunist Partiyası ilə müqayisə edən Mehman Əliyev iddia edir ki, Kommunist partiyası YAP-a nəzərən "daha demokratik olub".

Qurultdaydan sonra diqqəti çəkən məsələlərdən birinin bəzi şəxslərin partiyadan kənarlaşdırılmasının olduğunu deyən Mehman Əliyevin fikrincə bu, "olmalı idi".

"Bu tipli qərarlar verilməli idi. Çünki bu adamlar artıq rəhbər vəzifədə çalışmırdılar. Siz fikir verin, bu adamlar artıq rəhbər vəzifədə yoxdursa, deməli partiyadan da getməlidir. Yəni, məsələ birinci icra orqanında həll olunur, daha sonra partiyada. Bu, partiyanın demək olar ki, hər hansı gücə malik olmamasının bir nümunəsidir".

Yeni Azərbaycan Partiyası ilə Kommunist Partiyasını bir daha müqayisə edən Mehman Əliyev deyir ki, "əgər orda bir nəfəri əvvəl partiyadan çıxarırdılarsa, burada əksinədir".

Partiyanın quruluşundakı dəyişiklərə toxunan təhlilçi deyir ki, bununla partiyanın mövcud kollegiyal görüntüsü də aradan qaldırılıb.

"İndi birbaşa bağlandı ailəyə. Yəni, tandemə - İlham Əliyev və Mehriban Əliyevaya bağlandı.. Belə deyək ali hakimiyyətdən daha da asılı vəziyətə düşdü. Əvvəllər heç olmasa bir görüntü var idi, indi o görüntü də getdi".

Məlumata görə, Yeni Azərbaycan Partiyasının sədri İlham Əliyevin əmri ilə Əli Əhmədov partiya sədrinin müavini, Tahir Budaqov partiya sədrinin müavini - Mərkəzi Aparatın rəhbəri təyin edilib.

Partiyanın VI qurultayına qədər partiyanın sədr müavinləri Mehriban Əliyeva, Əli Əhmədov, Əli Həsənov və Akif Əlizadə olub.

YAP Siyasi Şurasının 84 üzvü olub. Onların arasında keçmiş Prezident Administrasiyasının rəhbəri Ramiz Mehdiyev, sabiq parlament spikeri Oqtay Əsədov, BDU-nun keçmiş rektoru Abel Məhərrəmov, sabiq deputat Hadı Rəcəbli və başqa vəzifələrindən uzaqlaşdırılmış şəxslər təmsil olunub.

Report YAP-ın İdarə Heyətinə istinadən yazır ki, İdarə Heyətinin keçmiş üzvləri - Prezidentin keçmiş köməkçisi Əli Həsənov və millət vəkili Siyavuş Novruzov yeni təsdiqlənən İdarə Heyətində yer almayıblar.

Bu günədək partiyanın Siyasi Şurasının üzvü olan AMEA rəhbəri Ramiz Mehdiyev isə yeni yaradılan Veteranlar Şurasının üzvü seçilib.

İlham Əliyev qurultaya videokonfrans vasitəsilə qoşulub.

Bundan başqa, Azərbaycan Xalq Demokratik Partiyası, Azərbaycan Kəndli Partiyası, Milli Qurtuluş Partiyası, Azərbaycan Yurddaş Partiyası, Azərbaycan Milli Hərəkat Partiyası və Azərbaycan Demokratik Sahibkarlar Partiyası Yeni Azərbaycan Partiyasına qoşulub.

Partiyanın sonuncu qurultayı 2018-ci ilin fevralın 8-də keçirilib.