Yerində olmayan MƏMURLAR və... - fəaliyyəti narazılıq yaradan QURUMLAR...

Yerində olmayan MƏMURLAR və...
Ölkədə aparılan sosial-iqtisadi və siyasi islahatlar davam edir. Dərinləşmiş islahatlar bir çox sahələri əhatə edir və müşahidələr göstərir ki, siyasi hakimiyyət islahatlar kursunda qərarlıdır.

Prosesin xalqı narazı salan, islahatlarla ayaqlaşmayan məmurları və onların rəhbərlik etdiyi qurumları əhatə edəcəyi şübhəsizdir. Açıq görünür ki, qarşıda bu islahat dalğasına tuş gələcək qurumlar, məmurlar da az olmayacaq. Çünki son dövrlər bir sıra qurumlarla bağlı ciddi şikayətlər mətbuata çıxır, sosial şəbəkələrdə müzakirə olunur. Əhali vaxtaşırı həmin quruma rəhbərlik edənlərdən şikayətini bildirir.

Bu təcrübə ölkədə artıq mövcuddur və bu günə qədər əhalini narazı salan, vətəndaşa doğru-düzgün xidmət göstərməyən qurum rəhbərləri vəzifədən uzaqlaşdırılıb. Bəzən də etimadı doğrultmayan məmurlar həbs edilib.

Ağstafa rayon İcra Hakimiyyətinin başçısı Nizaməddin Quliyev, Neftçala rayon İcra Hakimiyyətinin başçısı İsmayıl Vəliyev, Biləsuvar rayon İcra Hakimiyyətinin başçısı Mahir Quliyev, Yevlax İcra Hakimiyyətinin sabiq başçısı Qoca Səmədov, İmişli rayon İcra Hakimiyyətinin başçısı Vilyam Hacıyev və onların müavinləri, rəhbərlik 4 etdikləri qurumda digər vəzifəli şəxslər Dövlət Təhlükəsizlik Xidməti (DTX) tərəfindən saxlanılaraq məhsuliyyətə cəlb olunub.

DTX Mədəniyyət və Xarici İşlər nazirliklərində də əməliyyat keçirdi və nəticədə hər iki nazir- Əbülfəs Qarayev və Elmar Məmmədyarov tutduğu postdan uzalaşdırıldı. Artıq Xarici İşlər naziri vəzifəsinə təyinat da olub. Ceyhun Bayramov XİN rəhbəri təyin olunub.

Qeyd edək ki, C.Bayramov buna qədər Təhsil naziri idi. Doğrudur, Təhsil Nazirliyi özü də problemi qurumlar sırasındadır. Son dövlər ölkənin təhsil sistemində müəyyən işlər görülsə də, bu nazirlik hələ də vətəndaşların ən çox şikayət etdiyi qurumlar sırasında birincilərdəndir.

Təhsil naziri postu da uzun müddət boş qalmadı. Artıq bu posta da təyinat olub və dövlət başçısının sərəncamı ilə Emin Əmrullayev 27 iyulda Təhsil naziri təyin edilib. Yeni kadrların necə işləyəcəyini qısa zamanda hər birimiz görəcəyik.

Əhalini narazı salan qurumlar arasında ilk yerlərdən birini də Səhiyyə Nazirliyi və nazir Oqtay Şirəliyev tutur.

Xüsusilə də koronavirus epidemiyasının yayıldığı dövrdə Səhiyyə naziri Oqtay Şirəliyevin üzə çıxmaması, sabiq həmkarı Elmar Məmmədyarov kimi “evdən işləməsi” vətəndaşların səhiyyə sistemi ilə bağlı narazılığını daha da artırdı.

Onsuz da ölkədə səhiyyə sisteminin bərbad vəziyyətdə olması Oqtay Şirəliyevi daim hədəfdə saxlayır. Hətta Səhiyyə Nazirliyinə alternativ olaraq yarılan TƏBİB də səhiyyə sisteminin “dərdinin təbibi” ola bilmədi. İlk yaranan zamanda kifayət qədər ümidlər bəslənilən “Tibbi Ərazi Bölmələrini İdarəetmə Birliyi” publik hüquqi şəxsi (TƏBİB) də ümidləri doğrultmadı.

Doğrudur, TƏBİB-in ilk imtahanı çox çətin oldu və ümumi rəyi nəzərə alsaq, bu qurum COVID-19 imtahanından keçə bilmədi və “sinifdə qaldı”. Söhbət koronavirusa yoluxan xəstələrə dərmanların verilməməsi, verilən qərarların icra olunması və bu kimi problemlərdən gedir. Bütün bu qüsurlar qurum rəhbəri Ramin Bayramlının “üzünü ağartmadı”.

Pandemiya müddətində diqqət mərkəzinə gələn qurumlardan biri də Əmək və Əhalinin Sosial Müdafiəsi Nazirliyi oldu. Sərt karantin müddətində bir çox sahələrinin fəaliyyətinin məhdudlaşdırılması ilə əhalinin böyük bir hissəsi gəlirlərini itirdi. Bunu kompensasiya etmək məqsədi ilə dövlət müəyyən şərtlərlə vətəndaşlara, ehtiyacı olan hər ailədən 1 nəfər olmaq şərtilə 190 manat verilməsinə göstəriş verildi.

Bu işin icrası isə Əmək və Əhalinin Sosial Müdafiəsi Nazirliyə tapşırıldı. Nəticədə 2 ay müddətində 600 min işsiz və ya karantinə görə işini itirən şəxsə ödəmələrin həyata keçirildiyi açıqlandı. İyul ayı üçün də ödənişlər edildi, amma bu, bütövlükdə ölkə üçün nəzərdə tutulmamışdı və yalnız sərt karantin rejimi tətbiq olunan Bakı, Sumqayıt, Gəncə, Lənkəran şəhərləri və Abşeron, Yevlax, Cəlilabad, Masallı rayonlarına şamil edildi.

Amma “190 manat məsələsi” Əmək və Əhalinin Sosial Müdafiəsi Nazirliyi üçün əməlli- başlı başağrısına çevirildi. Əhali arasında “Ehtiyacım olduğu halda 190 manat” ala bilmədim” deyən o qədər insan oldu ki, bunun fonunda hər bir imkanı olan şəxslərin bu yardımı alması xəbəri insanlarda qıcıq yaratdı. Hər halda bütün bunlar da nazir Sahil Babayevin “neqativinə” yazılan faktlar idi.

Belə bir şəraitdə əhalini susuz qoyanlar da tapıldı. Hətta problem o həddə çatdırıldı ki, ölkə başçısı bununla bağlı müşavirə keçirdi. Prezident müşavirədə dedi: “Açıq deməliyəm, bu iş başlı-başına buraxılıb, heç kim bu məsələ ilə məşğul olmayıb. Aidiyyəti qurumların hər biri öz işləri ilə məşğul idi, koordinasiya aparılmamışdır. “Azərsu”, meliorasiya qurumları, sadəcə olaraq, dövlət investisiya proqramı müzakirə olunarkən fəallaşırdılar ki, onlara nə qədər dövlət büdcəsindən pay düşəcək. Bəzi hallarda onların təklif etdikləri layihələr, ümumiyyətlə, diqqətəlayiq deyildi. Sadəcə olaraq görürdüm ki, burada məqsəd dövlət vəsaiti götürüb ondan istifadə etməkdir. Amma ondan sonra bu layihələrin səmərəliliyinə kimsə baxıb? Kimsə bunu təhlil edib? Yox”.

Ölkə başçısının bu çıxışı həm Meliorasiya və Su Təsərrüfatı Komitəsinin sədri Əhməd Əhmədzad', həm də “Azərsu” ASC-nin rəhbəri Qorxmaz Hüseynov üçün bir mesajdır.

Yəqin ki, həm də sonuncu xəbərdarlıq mesajıdır.
Tarix: 28-07-2020, 11:04
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı