Koronavirusun başlanğıc nöqtəsi olan Uhanda insanlar belə əylənirlər FOTOLAR

Koronavirus pandemiyasının başlanğıc nöqtəsi olan Çinin Uhan şəhərində həyat normala dönüb.
Musavat.com xarici KİV-lərə istinadən bildirir ki, ötən gün şəhərdə keçirilən böyük musiqi festivalına minlərlə insan qoşularaq əylənib.
Xatırladaq ki, 2019-cu ilin dekabrın son günlərində Uhanda aşkarlanmış yeni tip koronavirus hazırda planetimizin bir nömrəli problemi olmaqda davam edir. Artıq bir il yarımdır həyatımızda olan virus hər gün minlərlə insanı öz qurbanına çevirir, milyonlarla insanın həyatına ziyan vurur. Bu günə qədər dünyada 153,4 milyondan çox insan virusa yoluxub, 3,2 milyon insan isə ölüb. Rəqəmlər hər saniyə artır. Bəzi ölkələrdə, o cümlədən Hindistanda, Braziliyada epidemioloji vəziyyət tamamilə nəzarətdən çıxıb.
Bütün bunların fonunda epidemiyanın ilk ortaya çıxdığı Uhanda həyat normal vəziyyətinə dönüb.
Bir çox ölkələrdə pandemiya ilə bağlı məhdudiyyətlər davam etdiyi halda, Uhanda böyük Çiyələk Musiqi Festivalı başlayıb. Festivalın ilk günündə minlərlə insan konsertlərdə iştirak edib.
"Daily Mail" qəzetinin yazdığına görə, ötən gün festivala 11 mindən çox insan qoşulub. Yayılan görüntülərdə insanların maska taxmadığı və sosial məsafəyə məhəl qoymadığı əks olunur.
Yerli mətbuatın məlumatına görə, Uhanda son zamanlar yalnız bir neçə yeni yoluxma faktı aşkar edilib. Bununla da şəhər epidemiyaya qalib gəlmiş hesab olunur.
Ötən gün Çində ümumilikdə cəmi 15 yeni yoluxma faktı qeydə alınıb.
Qeyd edək ki, bu günə qədər Çində 90,6 min insan koronavirusa yoluxub, 4,6 mindən çox insan virusdan vəfat edib. Bu göstəricilərinə görə Çin dünya ölkələri arasında 96-cı yerdədir.

---