Mayın 11-dən Fransa və İspaniyada milyonlarla insan üçün koronavirus pandemiyası qadağaları yumşaldılır, evdə qalmaqla bağlı göstərişlər qaldırılır. Britaniya isə təcridi daha da genişləndirir, Baş nazir Boris Conson yalnız yüngül yumşaltma elan edib.

Səkkiz həftədən sonra Fransada əhali icazə sənədi doldurmadan küçəyə çıxa biləcək. İbtidai məktəblər, bəzi mağazalar, gözəllik salonları açılır. Amma barlar, restoranlar, teatr və kinoteatrlar bağlı qalır. İspaniyada Madrid və Barselona kimi şəhər mərkəzlərini çıxmaqla əhali bayırda masaları olan bar və restoranlarda görüşə biləcəklər. Britaniya tələsmir

Conson mayın 10-da bildirib ki, onun ölkəsinin Fransa və İspaniyanın arxasında getməsi üçün çox tezdir. Amma onu da əlavə edib ki, evdən işləyə bilməyənlər gələn həftədən işə gedə bilərlər, ancaq ictimai nəqliyyatdan istifadə etməməyə çalışsınlar, fiziki məsafəni gözləsinlər. Conson mayın 11-də parlamentdə plan açıqlayacaq.

Ölkədə koronavirusda 32 minədək ölüm halı açıqlanıb ki, bu, Avropada ən yüksək, dünya üzrə Birləşmiş Ştatlardan sonra ikinci yüksək rəqəmdir.

Dünyada milyonlarla insan işə getmir, iqtisadiyyatlar çökür, hokumətlərsə iqtisadiyyatı yenidən işə salmağa çalışırlar. Birləşmiş Ştatlar pandemiya başlanandan 33 milyondan çox insan işini itirib və Prezident Donald Tramp noyabrda yenidən prezident postuna seçilmək istəyir deyə, problem xeyli qabarıqdır.

Maliyyə naziri Steven Mnuçin və Ağ evin iqtisadi məsələlər üzrə müşaviri Lari Kudlov mayın 10-da nisbətən sürətli artımla bağlı nikbinlik ifadə edib. Mnuçin deyib ki, ölkə təkrar açılım istiqamətində irəliləməsə, “Amerika ictimaiyyətinə əbədi iqtisadi ziyan” riski var. Kudlov ilin ikinci yarısında ABŞ iqtisadiyyatında kəskin dirçəlişin qeydə alınacağını proqnozlaşdırıb.

Yeni dalğa

Bu arada ABŞ-ın koronavirus pandemiyasına qarşı mübarizəsi üzərində işləyən üç aparıcı rəsminin özünü təcrid etməsi barədə informasiya yayılıb. Onlar xəstəliklə bağlı testləri pozitiv çıxan şəxslərlə ünsiyyətdə olublar.

ABŞ-da ştatların çoxu ehtiyatlı şəkildə açılıma gedir. Amma Səhiyyə Göstəriciləri və Qiymətləndirmə İnstitutunun direktoru Kristofer Muray deyib ki, qadağaları yumşaldan ştatlarda 10 gün içində yoluxma halları artacaq. İnstitut avqustun 4-dək ABŞ-da ölüm hallarının 137 minə çatacağını proqnozlaşdırıb. İndiyədək Birləşmiş Ştatlar koronavirusa 1,3 milyon yoluxma, 80 minədək ölüm halı qeydə alınıb. Dünya üzrə yoluxma sayı 4 milyon, ölü ayı 280 mindən çoxdur. Cənubi Koreyanın paytaxtı Seulda ötən Aydan qadağaları yumşaltmağa başladılar, ancaq yeni yoluxma dalğası müşahidə olunduğundan bir sıra gecə klubların məhdudiyyətlər qoyulub. Çin mayın 10-da 17 yeni yoluxmanın qeydə alındığını bildirib. Bu, aprelin 28-dən ən yüksək göstəricidir. (azadlıq.org)