Naxçıvanda muzeyin fəaliyyəti ilə bağlı ciddi iddialar səsləndirilir – 300 illik eksponat məsələsi araşdırılmalıdır

Naxçıvan Muxtar Respublikasında Babək Rayon Tarix-Diyarşünaslıq Muzeyinin fəaliyyəti və müəssisənin rəhbərliyi ilə bağlı redaksiyaya ciddi narazılıqları əks etdirən müraciətlər daxil olub. Səsləndirilən iddialar muzey rəhbərinin fəaliyyətindən tutmuş, tarixi eksponatların qorunması və qeydiyyatı məsələlərinə qədər bir sıra suallar doğurur. 

Babək Rayon Tarix-Diyarşünaslıq Muzeyi 1981-ci il dekabrın 18-də Ulu Öndər Heydər Əliyevin təşəbbüsü ilə yaradılıb. Rəsmi məlumatlara əsasən, muzeyin fondunda rayonun tarixini əks etdirən 3500-dən çox eksponat qorunur. Belə bir müəssisənin əsas vəzifələrindən biri isə maddi-mədəni irs nümunələrinin qorunması, öyrənilməsi, nümayişi və təbliğidir. Direktorun fəaliyyəti ilə bağlı narazılıqlar Redaksiyaya müraciət edən muzey əməkdaşlarının iddiasına görə, müəssisənin direktoru Sərxan Abdullayev iş vaxtının müəyyən hissəsini muzeydən kənarda keçirir və rəhbər kimi üzərinə düşən vəzifələri lazımi səviyyədə yerinə yetirmir. Müraciətdə direktorun Naxçıvan Respublika Xəstəxanasında bufet fəaliyyəti ilə məşğul olduğu və bunun muzeydəki fəaliyyətinə təsir etdiyi iddia olunur. Əməkdaşların sözlərinə görə, direktorun muzeydə əsasən rəsmi tədbirlər zamanı görünməsi ilə bağlı da narazılıqlar mövcuddur. Bu məlumatların həqiqətə uyğun olub-olmaması yalnız aidiyyəti qurum tərəfindən aparılacaq xidməti araşdırma nəticəsində müəyyən edilə bilər. 300 illik olduğu iddia edilən eksponat haradadır? Məsələ ilə bağlı daha ciddi iddia isə muzeydəki tarixi eksponatlardan birinin taleyi ilə bağlıdır. Redaksiyaya daxil olan məlumatda muzeyin keçmiş əməkdaşı Leyla xanımın sözlərinə istinadən bildirilir ki, təxminən 300 illik tarixi olduğu deyilən eksponat vaxtında muzey fonduna lazımi qaydada qeydiyyata alınmayıb və daha sonra başqa bir əməkdaş tərəfindən götürülüb. İddialara görə, məsələ ilə bağlı muzey rəhbərliyinə və Naxçıvan Muxtar Respublikasının Mədəniyyət Nazirliyinə məlumat verilsə də, hadisəyə lazımi münasibət göstərilməyib. Əgər bu məlumat təsdiqini taparsa, söhbət sıradan bir əşyadan deyil, tarixi və mədəni əhəmiyyət daşıya biləcək eksponatın uçotu və mühafizəsi məsələsindən gedir. Bu baxımdan hadisənin hərtərəfli araşdırılması vacibdir. Nazirlikdən araşdırma gözləntisi Hazırda səsləndirilən iddiaların heç biri rəsmi araşdırmanın nəticəsi ilə təsdiqlənməyib. Buna görə də məsələyə hüquqi qiymətin verilməsi və faktların müəyyənləşdirilməsi aidiyyəti dövlət qurumlarının üzərinə düşür. Xüsusilə muzeyin fondunda minlərlə tarixi eksponatın qorunduğu nəzərə alınarsa, hər hansı nümunənin qeydiyyatsız qalması, itməsi və ya mənimsənilməsi barədə məlumatlar ciddi şəkildə yoxlanılmalıdır. Digər tərəfdən, direktor Sərxan Abdullayevin fəaliyyəti ilə bağlı səsləndirilən iddialar, o cümlədən onun başqa yerdə bufet fəaliyyəti ilə məşğul olması barədə məlumatlar da araşdırılmalıdır. Müraciətlərdə, həmçinin direktor tərəfindən bəzi şəxslərə qarşı təzyiq və hədələyici ifadələrin səsləndirildiyi iddia olunur. Bu məlumatlar da hazırda yalnız müraciət edən şəxslərin ifadələrinə əsaslanır və müvafiq sübutlarla təsdiqlənməyib. Məsələyə aydınlıq gətirilməlidir Əsas sual budur: Babək rayonunun tarixini və mədəni irsini qoruyan dövlət muzeyində eksponatların uçotuna və mühafizəsinə, eləcə də müəssisə rəhbərinin fəaliyyətinə kim və necə nəzarət edir? Əgər səsləndirilən iddialar əsassızdırsa, onların aidiyyəti qurumlar və muzey rəhbərliyi tərəfindən rəsmi şəkildə təkzib edilməsi cəmiyyət üçün vacibdir. Əks halda, iddiaların həqiqətə uyğun olduğu müəyyənləşərsə, qanunvericiliyə uyğun tədbirlərin görülməsi və məsul şəxslərin müəyyən edilməsi zəruridir. Redaksiya olaraq Sərxan Abdullayevin və Naxçıvan Muxtar Respublikasının Mədəniyyət Nazirliyinin məsələyə münasibətini dərc etməyə hazırıq. Çünki burada söhbət yalnız bir müəssisənin rəhbərliyindən deyil, xalqın tarixi-mədəni irsinin qorunmasına cavabdeh olan dövlət muzeyindən gedir.