Zaqatalanın Aşağı Tala və Muxax kəndlərinin sakinlərinin içməli su problemi var. Sakinlər içməyə sularının olmadığını, məcbur qalıb bulanıq, palçıqlı çay suyu içdiklərini söyləyirlər. Bunun da onların səhhətinə mənfi təsir etdiyini deyirlər. DİA.AZ bildirir ki, sakinlər bir müddət öncə su yoxluğuna görə Prezident İlham Əliyevə də şikayət ünvanlayıblar: “Məktubumuz şikayətimizə baxılması üçün Zaqatala Rayon İcra Hakimiyyətinə ötürülüb. Necə ki, bu neçə ildə veclərinə deyildi, indi də veclərinə deyil”.
Muxax və Aşağı Tala əhalinin sayına görə Zaqatala rayonunun ən böyük kəndlərindəndir. Şikayətçilər bildirirlər ki, bu kəndlərin su təchizatı sistemləri uzun müddətdir yararsız haldadır. Hər iki kəndin sakinləri içməli suyun yoxluğundan əziyyət çəkir: “Çoxsaylı müraciətlərə aidiyyatı qurumlar tərəfindən baxılmır. Əhalinin içməli su ilə təminatının yaxşılaşdırılmasına dair verilən sərəncam və fərmanlar arasında təəssüf ki, Zaqatalada su təchizatının yaxşılaşdırılmasına dair heç bir sənəd yer almır. Halbuki hər iki kənd 10 ildir su problemi ilə üz-üzədir. Bu sahədə işin görüldüyünə dair layihələr üçün büdcə vəsaiti ayrılsa da, təyinatı üzrə bura qədər heç bir iş görülməyib. Xüsusən də pandemiya dövründə susuzluğun yarada biləcəyi təhlükəni nəzərə alaraq, bu onillik problem haqqında rəsmi şikayət etmək istədik”.
Sakinlər deyirlər ki, 21-ci əsrdə regionun ən güclü ölkəsinin vətəndaşının içməli suyunun olmaması biabırçılıqdır: “Bizi içməli su ilə təmin etmirlər. Əvəzində Meliorasiya və Su Təsərrüfatı Açıq Səhmdar Cəmiyyəti də iki daşın arasında Koronavirusla Mübarizə Fonduna 300 min manat ianə edir. Bir cibdən al, o biri cibə qoy. Əgər vəsait varsa, daha böyük problem də var. Birinci onu həll etsinlər”.
Muxax sakinləri bildirirlər ki, 10 min sakin suyu maşınlardan almaqla keçinir. Halbuki kənd elə dağların arasında yerləşir. İstəsələr, asanlıqla bütün əhalini su ilə təmin edə bilərlər: “Ancaq istəmirlər. İçməli su çaydan gəlir. Su hövzəsinə dolur, ordan da kəndə. Sabunçu kəndinin yuxarı hissəsində yerləşən hövzədə sutəmizləyici qurğu yoxdur. Çayın suyu tez-tez artdığından və ya azaldığından suyun yeri dəyişir, Muxaxa gedən su bununla bağlı azalıb artır, yağışa görə torpaqlı, palçıqlı olur və s. 2016-cı ildə suya görə kənddə nə qədər uşaq zəhərləndi. Sonradan məlum oldu ki, hövzədə heyvan cəsədi tapılıb. O qədər təhlükəlidir. Qorunmur, təmizlənmir, birbaşa kəndə verilir”.
Muxaxın 10 min nəfər sakini var. Şikayətçilər deyirlər ki, yay aylarında içməli suyun bir tonuna 5-10 manat pul ödəyirlər. O da ki, yenə təmiz su deyil: “Kənd sakinlərinə içməli su adı ilə suvarma üçün olan çaylaq suyu verilir. Bu suyun keyfiyyəti standarta uyğun olmadığından insanların səhhətində problemlər yaranır. 2016-cı ildə onlarla uşağın sudan zəhərlənməsi halı baş verib. Buna səbəb kəndə gələn su borusunun mənbəyində tapılan heyvan cəsədi olmuşdu. Zaqatala rayon Su Təsərüfatı İdarəsinin rəhbərliyi kənd sakinlərinin şikayətinə baxmayaraq uşaqların kütləvi zəhərlənməsini günvurma ilə əlaqələndirmişdi”.
Sakinlər deyirlər ki, içməli suyun keyfiyyətinin standarta uyğun olmaması su hövzəsindəki filterlərin istifadəyə yararsız vəziyyətdə olması ilə əlaqədardır. Kəndə su əvvəlki illərdə iki ayrı boru ilə gəlirmiş. Lakin borulardan biri torpaqdan çıxarılıb satılıb. Kənd sakinləri imza toplayaraq aidiyyatı qurumlara müraciət etsə də, əhalinin içməli su problemi hələ həllini tapmayıb.
Aşağı Tala kəndinin isə 8000 nəfər əhalisi var. Sakinləri deyirlər ki, kəndin su xətti keçən əsrin 70-ci illərində çəkilib. Sözügedən su xətti mənbəyini Meşleş körpüsünün yuxarı hissəsindən götürür, Yuxarı Tala ərazisi ilə gəlir, Aşağı Talanın başlanğıcındakı su anbarına (anbarın vəziyyəti çox acınacaqlıdır) tökülür: “Suyun keyfiyyəti standartlara uyğun deyil. Əhaliyə bulanıq çay suyu verilir. Təmizləyici filterlər yararsızdır. Bələdiyyə vaxtaşırı su mənbəyində təmir işləri aparsa da, kəndin içməli su probleminin həlli üçün yeni su hövzəsinin inşasına ehtiyac var. Xırda təmirlər üçün isə kənd sakinləri öz aralarında pul toplayaraq, müvəqqəti həll yolu tapırlar. Bunun isə sonu yoxdur”.
Sakinlər su ilə təmin edilməyi tələb edirlər. Bildirirlər ki, içməli suyun keyfiyyəti sanitariya tələblərinə, o cümlədən dövlət standartlarına uyğun gəlmədiyi üçün bu halların araşdırılmasına dair göstəriş verilməlidir. Aidiyyatı qurumlar problemin həlli üçün tez bir zamanda fəaliyyətə keçməli, deputat Elşən Musayev Zaqatala rayonunda su təchizatı və su təsərrüfatı ilə bağlı məsələni parlamentdə müzakirəyə çıxarmalıdır.
