Lənkəran Narkoloji Xəstəxanasında ÖZBAŞINALIQ - "Xəstəxananı bazar kimi idarə edir"

Lənkəran Rayonlararası Narkoloji Xəstəxanasında uzun müddətdir yaşanan gərginlik artıq məhkəmə müstəvisində davam edir. Durum elə həddə gəlib ki, baş həkimlə tabeliyində çalışan həkim məhkəmə müstəvisində çəkişir. DİA.AZ-ın məlumatına görə, 36-yaşlı həkim-narkoloq Bəhruz Kazımzadə deyir ki, xəstəxananın baş həkimi Vüqar Əliyev qayda-qanun saymır, ürəyi necə istəyirsə, o cür də hərəkət edir.

Onun sözlərinə görə, özbaşınalıqlara susmadığına görə aralarındakı mübahisələrin birində hətta baş həkim onu vurub. O da polisə şikayət edib: "Komissiya üzvlərinin yanında mənə əl qaldırdığına görə İnzibati Xətalar Məcəlləsinin 157-ci (döymə) maddəsilə məsuliyyətə cəlb olundu. Sözün düzünü deyirəm deyə, məni nüfuzdan salmaq üçün söz-söhbət yayır ki, guya spirtli içki aludəçisiyəm. Halbuki, mən spirtli içki içmirəm".

B.Kazımzadə bildirib ki, mübahisələrdən biri də həkimlərin maaşından tutmalara görə olub. 270 manat maaş aldığını söyləyən həkimin sözlərinə görə, bunun da 30 manatı tutulurdu.

O, baş həkimdən Prezident Administrasiyası, Heydər Əliyev Fondu, Dövlət Təhlükəsizliyi Xidməti və başqa orqanlara da şikayət məktubları göndərib. İddia edib ki, V.Əliyev tabeliyində çalışan və onun qanunsuz əmrlərinə tabe olmayanların normal fəaliyyətinə imkan vermir: "Baş həkim olduğu halda, özü növbəyə qalıb, gecələr polislərlə reydlərə çıxır. Saxta sənədlərlə diplom alan baş feldşerə həkim kimi şərait yaradır. Komissiyanın iştirakı olmadan istənilən rəyi yazıb verirlər. Komissiya üzvlərinin əvəzinə özləri imza atırlar. Xəstəxananı bazar kimi idarə edir".

B.Kazımzadə komissiya təşkil edilməsini, şikayətlərində göstərdiyi faktların araşdırılmasını tələb edir.

Baş həkimdən narazı olan B.Kazımzadə də məhkəmədə qarşılıqlı iddia qaldırıb. V.Əliyevin onun spirtli içki aludəçisi olması, işindəki nöqsanlara görə töhmət alması barədə söylədiklərinin yalan olduğunu vurğulayaraq, buna görə təkzib verməsini, 10 min manat da kompensasiya ödəməsini tələb edib.

Lənkəran Rayon Məhkəməsi B.Kazımzadənin iddiasını rədd edib. Baş həkimin iddia tələbi isə qismən təmin olunub. Məhkəmə qərar verib ki, həkim Baş Prokurorluq, Səhiyyə Nazirliyi, Prezident Administrasiyası və başqa orqanlara əvvəlki şikayətlərinə görə təkzib məktubu göndərsin. Bundan əlavə, baş həkimə mənəvi ziyana görə 500 manat kompensasiya, məhkəmənin ekspertiza xərclərinə görə də 200 manat ödəsin.

B.Kazımzadə bu qərardan narazı qalaraq apellyasiya şikayəti verib. Amma mayın 18-də şikayətə baxan Şirvan Apellyasiya Məhkəməsi qərarı dəyişməyib. Lənkəran Rayon Məhkəməsinin qərarı olduğu kimi qüvvədə saxlanılıb.

Şikayətçi həkim bundan sonra Ali Məhkəməyə üz tutmaq niyyətindədir.