Rusiyanın ABŞ-dakı səfiri Anatoli Antonov bildirib ki, daha 27 rusiyalı diplomat və ailələri ABŞ-dan çıxarılır və yanvarın 30-da ölkəni tərk edəcəklər.
“Bizim diplomatlarımız [ABŞ-dan] qovulur. Yanvarın 30-da yoldaşlarımın böyük bir qrupu – 27 nəfər ailələri ilə birlikdə bizi tərk edəcək… Biz ciddi kadr çatışmazlığı ilə üzləşirik” – Antonov şənbə günü yayımlanan “Soloviev Live” YouTube kanalına müsahibəsində deyib.
Rusiya daha əvvəl iki ölkə arasında münasibətlərin pisləşdiyi 2016-cı ildən bəri 100-dən çox rusiyalı diplomatın və onların ailələrinin ABŞ-ı tərk etmək məcburiyyətində qaldığını bildirib.
Rusiya Xarici İşlər Nazirliyinin sözçüsü Mariya Zaxarova oktyabrın 29-na kimi 200-ə yaxın rusiyalı diplomatın, o cümlədən Rusiyanın BMT-dəki nümayəndəliyinin əməkdaşlarının ABŞ-da işini davam etdirdiyini bildirib.
Oktyabr ayında Baydenin administrasiyası ABŞ-ın Rusiyadakı missiyasının 2017-ci ilin əvvəlindəki 1200-dən 120-yə qədər azaldığını bildirmişdi.
Bu ilin əvvəlində ABŞ-ın Moskvadakı səfirliyi qeyri-diplomatik vizaların verilməsini dayandırıb və rusları üçüncü ölkələrə viza üçün müraciət edə biləcək “evsiz vətəndaşlar” kimi təsnif edib.
Amerikanın səsi

---