Türkiyə Prezidenti: “Bu, reallaşması mümkün olan layihə deyil”
Türkiyə Prezidenti Rəcəb Tayyib Ərdoğan Avropa İttifaqının (Aİ) öz ordusunu yaratmaq ehtimalını dəyərləndirib. AYNA TASS-a istinadən xəbər verir ki, türkiyə lideri bu layihəyə münasibətini Romada keçirilən “Böyük iyirmilik” (G20) Sammitində Amerika Prezidenti Co Baydenlə danışıqlardan sonra bildirib.
“Bu, reallaşması mümkün olan layihə deyil. Ümumiyyətlə, bu, mümkün deyil”, - Türkiyə dövlət başçısı söyləyib.
Ərdoğan həmçinin Baydenə ABŞ-dan Suriyadakı PKK terrorçularına silah tədarükündən incidiyini deyib və bu prosesin gələcəkdə davam etməyəcəyinə ümid etdiyini vurğulayıb.
Qeyd edək ki, sentyabr ayının əvvəlində Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Cozef Borrell bildirmişdi ki, Avropa vətəndaşlarının Əfqanıstandan xaotik şəkildə təxliyəsi Avropa İttifaqı (Aİ) üçün ümumi müdafiənin təmin edilməsinin vacibliyini göstərir. Avropa diplomatiyasının rəhbəri 5000 hərbçidən ibarət vahid Avropa ordusunun yaradılmasına başlamağın zamanı olduğunu açıqlamışdı.