Ermənistanda seçkilər: Tərpəndikcə bataqlıqda batan ölkə...

Ermənistanda 20 iyunda keçiriləcək parlament seçkilərinə 2 həftədən daha az müddət qaldığı bir vaxtda namizədlər arasında rəqabət getdikcə daha da gərginləşməkdədir.

Ümumi reytinqinə görə əvvəldən əsas iki namizəd hesab olunan hal-hazırda baş nazir səlahiyyətlərinin icraçısı Nikol Paşinyan və Ermənistanın ikinci prezidenti Robert Köçəryan arasında davam edən mübarizədə artıq kimin qələbə qazanacağını söyləmək daha da çətinləşib.

Əgər bir neçə həftə əvvələ kimi Paşinyanın reytinqi onun qələbəsindən xəbər verirdisə, hal-hazırda vəziyyət heç də eyni deyil.

Qeyd edək ki, bu ilin fevralında 33,1% seçicinin dətəyini nümayiş etdirdiyi Paşinyana inananlar 22,4%-ə qədər azalıb. Əvəzində isə, Köçəryan qeyd olunan zaman kəsiyində seçicilərinin sayını 7,8%-dən 20,6%-ə qədər yüksəltməyə nail olub.

Paşinyan öz sonunu hazırlamaqdadır

Təbii ki, vəziyyətin bu formaya gəlib çıxmasının əsas günahkarı elə Paşinyanın özüdür. Sərsəm bəyanataları və addımları ilə günbəgün xalqın etimadını itirən Nikolun yanlışları isə saymaqla bitmir. Erməni təfəkküründən bixəbər şəxs təsüratı yaradan Paşinyanın gediş imkanları da xeyli məhdudlaşıb. Son baş nazir çıxışlarında yalnız keçmiş prezidentlərin səhvlərini xatırlatmaqla seçicilərin rəğbətini qazanamağa çalışır. Lakin bunun da fayda gətirmədiyi seçkiqabağı sorğularda açıq şəkildə nəzərə çarpır.

Köçəryanın ritorikası

Paşinyandan fərqli olaraq erməni xalqının revanşist ruhunun fərqində olan Köçəryan əlinə düşən fürsətdən maksimum yaralanaraq qalibiyyət yolunda əmin addımlarla irəliləməkdədir. Nikolun hər yalnış addımında doğru yolun bələdçisinə çevrilən Robertin populist çıxışları ermənilərin “Qarabağ klanı” liderinə olan inamını daha da artırmaqdadır.

Ermənilər də keçmiş prezidentin korrupsioner əməllərini unutmuş kimi görünür. 

Xüsusilə də İrəvanda Köçəryana səs verəcəklərini bildirən respondentlərin çoxluğu diqqəti cəlb etməkdədir. Görünür, paytaxtda oturub Azərbaycandan gələn mesajlara qulaqlarını qapamış İrəvan camaatı, həqiqətən də, revanşizm arxasıyca qaçmağı hədəfləyir.

Uduzan Ermənistan olacaq

Ölkənin ümumi mənzərəsi isə Ermənistanın gələcək fiaskosunun ilkin xəbərçisidir. Sərhəd probleminin meydana çıxmasından sonra revanşizm ruhunun genişləndiyi Ermənistanda Paşinyanın yarıtmaz qərbyönümlü siyasəti, çıxışlarında açıq şəkildə Rusiyaya yaltaqlanmaqdan çəkinməyən Köçəryanı xalqın gözündə xilaskara çevirib. Azərbaycan-Ermənistan münasibətlərinin bu qədər kəskinləşməsinin əsas günahkarı və ölkəsində hökm sürən xaosun əsas səbəbkarı olan Köçəryanın əməllərindən razı görününən ermənilər isə “hər xalq layiq olduğu lider tərəfindən idarə olunur” fikrinin məhz onlara ithaf edildiyini bir daha təsdiqləməkdədirlər.

Buna gücü yetməsə belə, “heç bir dəhlizdən söhbət gedə bilməz” deyən Köçəryanın iqtidara gəldikdən sonra Azərbaycan üçün başağrısı olmayacağının qarantiyasını isə heç kim verə bilməz.

44 günlük müharibədə aldıqları zərbədən dərs çıxarmaq istəməyən ermənilər isə regionda sülhə təhdid olmağa davam edəcəklərini və öz xislətlərini bir daha sübuta yetirməyə çox yaxındırlar...

Ermənistan indi bataqlıqda tərpəndikcə batan adama bənzəyir...

---