Dünyanın ən varlı adamı olan Ceff Bezosun sərvəti yaradıcısı olduğu “Amazon” şirkətinin səhmlərinin bahalaşması fonunda rekord həddə çatıb.
“Report” xəbər verir ki, bu barədə “Forbes” məlumat yayıb.
Nəşrin məlumatına görə, çərşənbə günü gündüz vaxtı “Amazon”un kapitallaşması 1,52 trilyon ABŞ dollarına çatıb. Bununla da onlayn pərakəndə satış şirkətinin səhmlərinin 11,1 faizinə sahib olan Bezosun sərvəti 181,5 milyard ABŞ dollarını keçib. “Forbes” bunun statistikalar aparılan müddətdə rekord göstərici olduğunu vurğulayıb.
Nyu York Fond Birjasında ticarətin yekunlaşması anına “Amazon”un bir səhminin dəyəri bir günə 2,7% artaraq 3 081,11 ABŞ dolları təşkil edib. Bazar ertəsi şirkətin kapitallaşması ilk dəfə 1,5 trilyon ABŞ dolları həddini keçmişdi.
Aprel ayında “Forbes” ardıcıl üçüncü dəfə Bezosu dünyanın ən varlı adamları siyahısında birinci yerdə göstərmişdi. O zaman jurnalın ekspertlərinin hesablamalarına görə, iş adamının sərvəti təqribən 113 milyard ABŞ dolları dəyərində idi. İkinci yerdə 98 milyard ABŞ dolları sərvəti olan “Microsoft”un qurucularından biri Bill Geyts, üçüncü sırada isə sərvəti 76 milyard ABŞ dolları həcmində qiymətləndirilən Fransanın LVMH (Louis Vuitton Moet Hennessy) şirkətlər qrupunun baş direktoru Bernar Arno tutmuşdu.
Qeyd edək ki, internet vasitəsilə onlayn qaydada mal və xidmətlər satan “Amazon” şirkəti 1994-cü ildə ABŞ-da Bezos tərəfindən təsis edilib. Şirkət kitab və musiqi plastinkaları satışından tədricən videoyazılar, videooyunlar və məişət elektronika məhsulları ticarətinə keçib, eləcə də ABŞ-da ilk dəfə saytının istifadəçilərinə internetə qoşulmadan izləmək imkanı ilə pullu film yükləmə xidmətini təklif edib.

---