İşğalçı Dağlıq Qarabağ rejiminin başçısı Araik Arutunyan “hökumətin” strukturunu yeniləyib. Novator.az bildirir ki, məlumatı dekabrın 18-də Armeniasputnik.am saytı yayıb.
Yeniliyə görə, hökumət “Xarici İşlər”;“Müdafiə”;“Ədliyyə”; “Maliyyə”; “İqtisadiyyat və Kənd Təsərrüfatı”; “Əmək, Sosial Məsələlər və Miqrasiya”; “Ərazi İdarəçiliyi və İnfrastruktur”; “Şəhərsalma”; “Səhiyyə”; “Təhsil, Elm, Mədəniyyət və İdman” nazirliklərindən ibarət olur.
“Maliyyə naziri”nə eyni zamanda “hökumətə” rəhbərlik hüququ – “dövlət naziri” statusu verilir.
Qondarma hökumətdə bu qurumlar da var: “Milli Təhlükəsizlik Xidməti”; “Polis”; “Fövqəladə Hallar üzrə Dövlət Xidməti”; “Dövlət Əmlakı İdarəçiliyi və Kadastr Komitəsi”, “Dövlət Gəlirləri Komitəsi”.
1988-ci ildə ermənilər Azərbaycanın Dağlıq Qarabağ Muxtar Vilayətinin Ermənistana verilməsi tələbi ilə separatçı hərəkata başlayıb. Bu hərəkat getdikcə vüsət alaraq Ermənistanın Azərbaycana açıq hərbi təcavüzünə çevrilib.
1991-ci ildə ermənilər Dağlıq Qarabağı “müstəqil dövlət” elan edib. Bunun ardınca işğalçı müharibə alovlanıb. 1994-ci ilin may ayında elan olunan atəşkəsə qədər Ermənistan Dağlıq Qarabağı və onun ətrafındakı 7 rayonu ələ keçirib.
2020-ci il sentyabrın 27-dən Azərbaycan Ordusunun apardığı hərbi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının və keçmiş Ağdərə rayonunun bir hissəsi azad olunub.
Noyabrın 10-da hərbi əməliyyatlar dayandırılıb. Ermənistan noyabrın 20-də Ağdam rayonunu, noyabrın 25-də Kəlbəcər rayonunu, dekabrın 1-də Laçın rayonunu Azərbaycana qaytarıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun böyük hissəsi ermənilərin nəzarətində qalır. İşğalçı rejim özünü “Dağlıq Qarabağ Respublikası” və ya “Arsax Respublikası” adlandırır.
İşğalçı rejimdə 1991-ci ildən bəri 7 “parlament seçkisi”, 6 “prezident seçkisi”, 7 “bələdiyyə seçkiləri”, 3 “referendum” keçirilib.
Müxtəlif illərdə rejimə Leonard Petrosyan (iki dəfə), Artur Mkrtçyan, Georgi Petrosyan, Robert Köçəryan, Arkadi Qukasyan, Bako Saakyan rəhbərlik edib.
2020-ci ildən rejimə başçılıq edən Araik Arutunyan Azərbaycana qarşı işğalçı müharibənin iştirakçısıdır. 2007-2017-ci illərdə Dağlıq Qarabağ rejiminin “baş naziri”, 2017-2018-ci illərdə “dövlət naziri” olub.

---