“Bombalar yağır, geri çəkilməyə icazə ver” - Poqosyanın Paşinyana zəngindən

Milli Məclisin deputatı Zahid Oruc genişmiqyaslı hərbi əməliyyatların 3-cü günü, yəni 29 sentyabrda Cəbrayıl istiqamətində gedən döyüşlər zamanı 9-cu polkun 18-ci motoatıcı diviziyasının komandiri Artyom Poqosyanla Nikol Paşinyan arasında gedən telefon danışıqlarına dair sensasion məlumatları açıqlayıb.
“Qafqazinfo” xəbər verir ki, Z.Oruc qeyd edib ki, Azərbaycan ordusunun görünməmiş miqyasda bütün parametrlər üzrə üstünlüyünü anındaca hiss edən diviziya rəhbəri telefonla baş nazirdən xahiş edir ki, əsas zərbə nöqtəsi sayılan cənub cinahında yerdən və göydən üstlərinə yağan mərmilərin, bombaların zərbəsindən qorunmaq üçün icazə versinlər ki, onlar 2-ci müdafiə xəttinə çəkilsinlər: 
"Bununla da uşaqları qorusunlar, sonra hücuma keçmək üçün səfərbər olunarlar.
Küçə aksiyaları ilə səngəri səhv salan və döyüş əmrlərini hərbi qərargahlardan deyil, birbaşa İrəvandakı isti kabinetlərdən idarə edən hökumət başçısı Poqosyana “bir addım da geri atmaq olmaz” əmrini verir. Nəticədə diviziya tamamilə darmadağın edilir, şəxsi heyət büsbütün məhv olur, komandir yaralanır və cəmi 3 nəfər salamat qalır.
Onlar həyatını itirən yüzlərlə hərbçinin qanı üzərindən özünün reklamını quran Araik Arutyunyanın buna görə cavab verəcəklərini, taktiki geriçəkilməyə yol verilmədiyi üçün siyasi rəhbərliyin özünə qurduqları təbliğatı kəskin pisləyirlər, hesab gününün gələcəyini açıq bildirirlər və belə itaətsizliyi görən hakimiyyət orqanları Poqosyanı 5 gün İrəvanda saxladıqdan sonra MTN tərəfindən həbs etdirib. Hazırda komandir istintaq altındadır".
Z. Oruc başqa bir məlumatda erməni informasiya texnoloqlarının bu müharibəyə qatdıqları dramatizm fonunda bütün dünyaya yaydıqları simvol-savaşın erməni siması olan əsgər Albert Ovanisyanın taleyiylə bağlı məlumatları da bölüşüb. Onun sözlərinə görə, 5 oktyabr tarixindən döyüşlərdə öldürülən “əfsanə”, ağır antisanitar şəraitdə xidmət edənlərdən biri kimi səyyar qida və geyim təminatının pis olmasından daim gileylənib, məhv edildikdən sonra isə şəxsən Ermənistanın birinci xanımı sayılan Anna Akopyanın tapşırığı ilə bir neçə gün İrəvan morqunun soyuducusunda saxlanıb ki, hərbi uniformalı ledi öz səhifəsindən kədərli statuslarını paylaşıb özünə xal qazansın:
“Müəlliflər qeyd edir ki, Albert Ovanisyanın ata-anası neçə gün bütün ölkəyə axtarış verib oğlunu axtardığı halda “hakim dəlilər ailəsi” qələbə simvolu-gündən-günə itirilən torpaqların fonunda özlərinə siyasi kampaniya aparırdılar.
Digər bir xəbər, Hindistandan alınan Su-30 təyyarələrinə hər hansı raket alına bilinmədiyi üçün onların yararsız qalmasına dairdir. Maraqlıdır ki, Rusiyadan bunun üçün bütün erməni milyonçuları birləşsələr də, Suriyaya göndərildiyinə görə zavodlar abramyanların, karapetyanların tələblərini yerinə yetirməyiblər. Ona görə onsuz da çox böyük "otkat"la alınmış təyyarələr Paşinyanın çevrəsindəki antimlli və sorosyanlı komandasına milyonlarla qazandırdığı halda indi müharibədə ordunun işinə yaramır.
Vahimə və qorxunc iddialarla müşaiyət olunan informasiyalarda rəsmi İrəvanın günlərdir cəsədləri almaqdan imtinasının erməni cəmiyyətində baş verəcək kütləvi şok və ondan sonra baş qaldıracaq üsyanlarla bağlı olduğu deyilir. Bildirilir ki, rəsmi təsdiqlənən 834 nəfər fiziki itki fonunda ən azı 1550 nəfər cəsəd sərhəddə qəbulunu gözləyir.
Bəli, Ermənistan informasiya məkanına “demokratik senzura”nın tikanlı məftilləri nə qədər sərt çəkilsə də hakimiyyətin xaos və iflasın bir addımlığında olduğu, həqiqətləri gizlədə bilmədiyi göz qabağındadır.
Müharibə Paşinyanı, onun timsalında da erməni dövlətçiliyini süqutla üz-üzə qoyub”.

---