“Ramiz Mehdiyev dövlətçilikdən tamamilə bixəbər adamdır” – Mirmahmud Mirəlioğlu

“Ramiz Mehdiyev dövlətçilikdən tamamilə bixəbər adamdır”
Klassik Xalq Cəbhəsi Partiyasının sədri Mirmahmud Mirəlioğlunun Yenisabah.az-a müsahibəsi:

- Mirmahmud bəy, hakimiyyətlə əks düşərgə arasında baş tutan təmasları, müşahidə olunan yumşalmanı Azərbaycanda yeni siyasi şəraitin yaranması kimi dəyərləndirmək olarmı?

- Əgər bunun konkret olaraq real nəticələri olacaqsa, məsələn, partiyaların qeydə alınmasında müsbət addımlar atılacaqsa, mümkündür. Bunun üçün dilə gətirilən məsələlər gerçəkləşdirilməli, mənzil-qərargahların partiyalara verilməsi məsələsi reallaşmalı, hakimiyyətin YAP-a münasibəti ilə digərlərinə münasibəti arasında uçurum olmamalı, qurultayların keçirilməsi ilə bağlı şərait yaradılmalıdır. Xüsusilə də bu karantin dövrünün təsir və qadağalarını bir kənara qoyaraq bu məsələlər həyata keçirilərsə, siyasi şəraitin yaranması kimi qiymətləndirmək mümkün olacaq. Amma uzaqgedən nəticələr çıxarmaq doğru deyil, bunu üçün tezdir.

- Son vaxtlar müxalif düşərgədə fəallıq hiss olunur. Bəzi müxalifət partiyalarının sabiq nazir Əli İnsanovun ətrafında cəmləşəcəyi gözlənilir. Bu ittifaqda sizin də iştirakınız mümkündür?

- Bizim bir müddət əvvəl danışıqlarımız olub. Klassik Xalq Cəbhəsi Partiyası olaraq Azərbaycan Xalq Hərəkatındayıq və mübarizəmizi də davam etdiririk. Təbii ki, bu mübarizədə əməkdaşlıq tələb edən məqamlarda əməkdaşlıq mümkündür. Hazırda onların yeni taktikaları, ayrı-ayrı oraya birləşən adamlar var. Hətta bizim qurultay nümayəndələrindən biri orada iştirak edir. Onların 4+1 kimi yeni bir formulları da var. Bəzi məsələlər var ki, müsahibədə deyilməsi mümkün deyil. Amma bildirim ki, məhz həmin məsələlərdə ciddi fikir ayrılıqları var. Azərbaycanın problemlərini həll etmək istiqamətində iqtidarlı-müxalifətli çalışılmalıdır. Kimliyindən asılı olmayaraq hər kəs istəyər ki, problemlər aradan qalxsın. Bəzi məsələlər var ki, bölüşülməlidir və bölüşüb birlikdə yerinə yetirəcəyik. Bəzi hallar isə diskussiyaya gətirib çıxarır. Mən bunlardan qaçıram. Hədəflərimiz bir olduğu təqdirdə mübarizəyə hazırıq. Kimliyindən asılı olmayaraq bu bir siyasətdir və siyasətdə dost və düşmən yoxdur, maraqlar var. Azərbaycan maraqları bütün siyasi məsələlərdən, siyasi partiyalardan, hətta siyasətçilərin özlərindən də üstündür.

- Hakimiyyətdən sıxışdırılan “köhnə qvardiya”nın revanşa hazırlaşdığına dair ehtimallar da var. Hətta Mehdiyev-İnsanov ittifaqının qurulduğu iddia olunur. Siz bu barədə nə düşünürsünüz?

- Onların ortaya hər hansısa bir şey qoymaları məsələnin başqa tərəfidir. Hər halda Ramiz Mehdiyevin son açıqlaması ciddi məsələlərdən xəbər verir. Adamın dövlətçilikdən tamam bixəbər olduğu ortadadır. Qədim saray qaydalarına uyğun olaraq hər dəfə sədaqəti təzələmək lazımdır. O da buna uyğun gedir. Görünür, Azərbaycan kimi bir dövlətdə uzun müddət aparıcı şəxs olmuş bir adamın şəxsi sədaqət məsələsi dövlətçilik məsələsindən üstündür. Nəticədə isə vəziyyət bu yerdədir. Hazırda ola bilər ki, kimsə kimləsə birləşsin, revanş götürsün. Əslində, bu, indiki zamanda nəzəri olaraq mümkündür, praktik olaraq isə mümkün deyil.

- Pandemiya fəaliyyətinizə necə təsir göstərib? Mərkəzi strukturlar işləyirlər? Rayon təşkilatları ilə əlaqələriniz var?

- Vəziyyət hamıda necədirsə, bizdə də elədir, lakin biraz fərqliliklər də var. Blirsiz, bizim cəmiyyətimiz bu məsələlərə hazır deyildi. Hazırda bütün resursları olan hökumət belə fəaliyyət göstərə bilmir. Dünyanın aparıcı dövlətləri belə istədikləri fəaliyyətə sahib deyillər. O cümlədən də Azərbaycanda fəaliyyət göstərən siyasi partiyalardan biri kimi KXCP-nin bu sahədə xeyli çətinlikləri var. Qeyri-adi bir şey yoxdur. Bizim rayon-şəhər şöbələri ilə əvvəlcədən də telefon vasitəsilə əlaqələrimiz var idi. Lakin onsuz da maddi imkansızlığa görə mütəmadi olaraq rüblük, aylıq, həftəlik səfərlərin təxirə salınması əvvəldən var idi. Konfransların keçirilməsinə polis müdaxiləsi mövcud idi. Bunlar indi biraz başqa formadadır və mövcud şəraitin diqtə elədiyi çətinliklər, karantinin qadağaları bizdən yan ötməyib.

- Azərbaycanda koronavirusla mübarizəni necə qiymətləndirirsiniz? Bu bəladan daha az itki ilə çıxmaq mümkün olacaqmı?

- Başlanğıcdan Azərbaycan səhiyyəsi buna hazır deyildi. Təbii ki, ayrı-ayrı yüksək səviyyəli, ixtisaslı həkimlərimiz buraya daxil etmirəm. Amma Səhiyyə Nazirliyi o qədər bərbad vəziyyətdə idi ki, yaxşılar da gözdən itib. Karantin vəziyyətindən xeyli danışılıb, hazırda da danışılır.Vəziyyət o dərəcədə pisdir ki, bizim rəsmi strukturumuz yox, TƏBİB ortaya çıxır. Çünki Səhiyyə Nazirliyi bu işin öhdəsindən gələ bilmir. Kimin necə deməsindən, sözün dəyişdirilərək efirə verilməsindən asılı olmayaraq, bu məsələdə problemlər hazırda da qalmaqdadır. İlk növbədə problemləri aradan qaldırmaq lazımdır. Lakin Azərbaycan hakimiyyəti bu istiqamətdə gördüyü işlər çabalama xarakteri daşıyır. Əslində, onun problemin öhdəsindən gəlmə imkanları daha geniş idi, qüvvələr səfərbər olunmalı idi, lakin olunmadı. Proses o dərəcədə uğursuz davam edir ki, Operativ Qərargahın qarşısında belə etirazlar var. Məsələlər o dərəcədə həll edilmədi ki, hər ay bir cür yanaşma ortaya çıxdı. Məsələn,190 manatla bağlı çox problemlər oldu, insanlarımızın testdən keçməsində xüsusi məbləğ tətbiq olundu, bunların hamısı aradan qaldırılmalı, atılan addımlar dövlət hesabına olmalıdır. Görülməli olan çox işlər var.
Tarix: 10-07-2020, 21:28
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı