Cəbrayıldakı qondarma kirsə hay-küyünün ardınca ermənilər növbəti şouya start veriblər. Ermənistanın media orqanları davamlı şəkildə Rusiya sülhməramlılarının təsir dairəsində olan ərazisində guya baş vermiş hadisəni tirajlayırlar.
 
Pravda.az-ın məlumatına görə, ermənilər iddia edirlər ki, Əsgəran rayonu ərazisində “azərbaycan hərbçi” erməni sakinlərin avtomobillərini “daş atəşi”nə tutub. Azərbaycan ərazilərində hoqqabazlıqla məşğul olan erməni terrorçuları rəsmi Bakını üçtərəfli razılaşmanı “pozmaqda” ittiham edir. İddia olunur ki, guya martın 25-də Rusiya sülhməramlılarının müşayiətilə Saruşen (Xocalı rayonunun Dağyurd kəndi-M.) kəndi ilə Əsgəranın “Karmir Qyux” kəndi arasındakı yoldan keçən Azərbaycan kolonundan Qarabağ sakini Lentruş Babayana məxsus VAZ 21-07 avtomobilə “daş atılıb”. Terrorçu rejimin oyuncaq “daxili işlər naziri” Karen Sarkisyanın sülhməramlı kontingentin komandanı Rustam Muradova müraciət etdiyi bildirilir.
 
Eyni vaxtda Rusiya sülhməramlılarının ermənilərə meydan verən qərarı təbii ki, təsadüfi deyil. 26 martda yayılan məlumata görə, “Artsax Respublikası”nın daxili təhlükəsizliyi səbəbindən rus və erməni əməkdaşlardan ibarət əməliyyat və xilasetmə qrupu dövlət fövqəladə hallar xidmətinin Lisaqor ( Şuşa rayonunun Turşsu kəndi) bazasında birgə növbətçilk xidməti aparacaq. Bildirilir ki, sülhməramlılarla erməni separatçıları arasındakı “əməkdaşlıq çərçivəsində” 3 işçi qrupunun yaradılması qərara alınıb. Sabahdan, yəni martın 27-dən etibarən erməni-rus tərəfdaşlarından ibarət bir istehkamçı qrupu Yuxarı Qarabağ ərazisində həm qəsəbələrdə, həm də vadilər, tarlalar və meşə zolaqları boyunca əhalinin sərbəst və təhlükəsiz hərəkətini təmin etmək üçün mühəndis tədqiqatları aparacaq.
 
“Azərbaycanlıların daş atması” şou-xəbərinin ardınca sülhməramlıların anti-Azərbaycan qərarı! Belə görünür ki, Xankəndidəki bütün ssenarilər əslində “rus dilində” yazılır və sadəcə burada səhnələşdirilməsi üçün erməni terrorçularına təqdim olunur.
 
Musavat.com

---