Üçüncü Qarabağ müharibəsi? – Ekspert ötən gün Hadrut istiqamətində baş verənləri dəyərləndirdi


Ötən gün Xocavənd rayonu istiqamətində erməni təxribatının törədilməsi ilə bağlı xəbər ilk olaraq sosial şəbəkələrdə yayıldı.

Müdafiə Nazirliyi tərəfindən baş verən hadisələrlə bağlı rəsmi xəbərin bir qədər gec verilməsi isə narazılığa səbəb olub. Eyni zamanda bir qrup şəxs ermənilər tərəfindən törədilən bu təxribatı yeni münaqişənin başlanğıcı kimi də qiymətləndirdi.

Maraqlıdır, nazirlik tərəfindən məlumatın gec verilməsi nə ilə əlaqədardır? Ermənilərin növbəti hücumunu yeni münaqişənin başlanğıcı kimi dəyərləndirmək doğrudurmu?

Sfera.az-a açıqlamasında bu sualları cavablandıran hərbi ekspert İbrahim Rüstəmli hərbi sahədə bəzi məlumatların ümumiyyətlə yayımlanmalı olmadığını və operativliyin dəqiqliyin önünə keçməməli olduğunu bildirib:

"Hərbdə bəzi informasiyaların yayılması ümumiyyətlə məqsədəuyğun sayılmır. Yəni, insanlar elə düşünməməlidirlər ki, onlara cəbhədə baş verən hər şey haqqında məlumat verilməlidir. Söhbət hərbidən, Silahlı Qüvvələrdən gedəndə bir qədər məhdudiyyət tətbiq oluna bilər.

Bu şou sahəsi deyil ki, hər hadisə yayımlansın. Eyni zamanda bu informasiyaları yayan instansiyaların hər hansı məlumatı məxfi saxlamaq hüququ da var. Düzdür, ötən gün Hadrutda baş verən hadisələrlə bağlı rəsmi məlumat daha tez verilə bilərdi. Çünki rəsmi məlumat ümumi hadisələrin bu və ya digər şəkildə deformasiyaya uğramasının qarşısını alır.

Ümumilikdə götürdükdə isə informasiya siyasətinin arxasında operativliklə bərabər dəqiqlik də dayanır. Bu baxımdan operativliyi dəqiqliyə qurban vermək olmaz. Həmçinin nazirlik baş verən hadisələri sosial şəbəkələrdə yayıla biləcəyi ehtimalını önləməlidir. Bununla da yayıla biləcək şayiənin, dezinformasiyanın qarşısı alınır. Lakin təkrar olaraq deyim ki, bəzi informasiyaların cəmiyyətə ötürülməməsi kimi qaydalar da mövcuddur".

"Qarabağda yerləşən erməni lokal qruplaşmalar sahibsiz tör-töküntüdür"

Ekspert ermənilərin qəfil təxribatlar törətməsinin yeni münaqişə yaratmaq istəyi ilə bağlı olmadığını qeyd edib:

"Azərbaycan 44 gün ərzində Ermənistan ordusunun bütün infrastrukturunu sıradan çıxarıb. Yəni, indiki məqamda Ermənistan demək olar ki, hərbi infrastrukturkla bərabər iqtisadi-siyaasi infrastrukturunu da itirib. Bu gün Qarabağda yerləşən lokal qruplaşmalar həmin məhv olmuş infrastrukturun tör-töküntüləridir. Bu səbəbdən onların ani hücumu, təxribata yol verməsi gözləniləndir. Bu kimi təcrübələr İkinci Dünya müharibəsi dövründə də yaşanıb.

İndi sahibsiz qalan həmin ermənilərin döyüşmək arzusu yoxdur. Əgər ermənilərin belə niyyəti olsaydı, silahlarını yerə qoyub könüllü təslim olmazdılar. Yəni, ötən gün Hadrut istiqamətində belə dəstələrin meydana çıxması ermənilərin Azərbaycana yeni savaş açması anlamına gəlmir".
Tarix: 28-12-2020, 17:07
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı