Niyaməddin Orduxanlının qohumu polislərə silah çəkdi - TƏFƏRRÜAT

Niyaməddin Orduxanlının qohumu polislərə silah çəkdi
Abşeron rayonunda həbs olunan Novruz Orduxanlının barəsində bir neçə maddə ilə ittiham elan edilib.

Demokrat.az-ın əldə etdiyi məlumata görə, Mehdibada qəsəbəsinin sakini Novruz Qədir oğlu Orduxanlının barəsində Cinayət Məcəlləsinin 127.2.1-ci (zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özü və ya yaxın qohumları barəsində qəsdən sağlamlığa az ağır zərər vurma), 228.1-ci (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) və 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə ittiham elan edilib.

Novruz Orduxanlın barəsində həbs qətimkan tədbirinin seçilməsi üçün istintaq orqanı tərəfindən Abşeron rayon Məhkəməsinə təqdimat verilib.

Təqdimata hakim Sevinc Quliyevanın sədrliyi ilə bu gün ərzində baxılacaq.

Xatırladaq ki, Novruz Orduxanlı Mehdiabad qəsəbəsində saxlanılıb. O, saxlanılan zaman hüquq-mühafizə orqanların əməkdaşları ilə mübahisə edib, onlara silah çəkib.

Hadisə yerində olan polis əməkdaşlarına müqavimət göstərib.

Qeyd edək ki, Novruz Orduxanlı bir neçə il əvvəl də cinayət törətmişdi. O, taekvando üzrə idman ustası Səbuhi İsmayılovu bıçaqlamışdı. Sahib İsmayılov “Taekvando” idman klubunun Qəbələ “Taekvando” idman məktəbinin baş məşqçisidir.

Həmin ittihama görə, 1994-cü il təvəllüdlü Novruz Orduxanlının 20 mart 2018-ci ildə səhər saatlarında Abşeron rayonunun Mehdiabad qəsəbəsində tanışı Kamran İsmayılovla mübahisəsi yaranıb.

Mübahisə zamanı Novruz Orduxanlı Kamran İsmayılovu nalayiq söyüşlərlə təhqir edib və onun şəxsiyyətini alçaldıb. Kamran İsmayılov bu barədə qardaşı Səbuhiyə xəbər verib.

Daha sonra Səbuhi İsmayılov Novruz Orduxanlını görüşə dəvət edib. Onlar martın 21-də Mehdiabad qəsəbəsində, 28 May küçəsindəki “Praqa” çay evinin arxa tərəfindəki boş ərazidə görüşüblər.

Səbuhi İsmayılov Novruz Orduxanlıya qardaşını təhqir etməsinə görə iradını bildirib. Nəticədə onlar aralarında mübahisə yaranıb. Novruz Orduxanlı üstündə gəzdirdiyi bıçaqla Səbuhi İsmayılova xəsarət yetirib.

Yaralıya xəstəxanada vaxtında tibbi yardım göstərildiyi üçün həyatını xilas etmək mümkün olub. Hadisəni törədən Novruz Orduxanlı həbs edilib.

İstintaq orqanı tərəfindən Novruz Orduxanlının barəsində Cinayət Məcəlləsinin 126.1-ci (qəsdən sağlamlığa ağır xəsarət yetirmə) maddəsi ilə ittiham elan edilib.

Bakı Ağır Cinayətlər Məhkəməsinin hökmü ilə Novruz Orduxanlı 5 il 6 ay müddətinə azadlıqdan məhrum edilib. Hökmdən narazı qalan Novruz Orduxanlı apelyasiya şikayəti verib. O, barəsində olan cəzanın yüngülləşdirilməsini xahiş edib.

Novruz Orduxanlının şikayəti araşdırılması üçün Sumqayıt Apelyasiya Məhkəməsinə göndərilib. Hakim Vidadi Cəfərovun sədrliyi ilə baş tutan prosesdə apelyasiya şikayətinin dəlilləri araşdırılıb, sonda qərar elan edilib.

Məhkəmə Novruz Orduxanlının şikayətinin təmin edib. Onun əməli Cinayət Məcəlləsinin 130.1-ci (zəruri müdafiə həddini aşmaqla qəsdən sağlamlığa ağır zərər vurma) maddəsinə tövsif edilib. Ona 9 ay cəza təyin edilib.

Bu qərardan narazı qalan prokuror apelyasiya protesti verib. Prokuror Novruz Orduxanlının barəsində olan Sumqayıt Apelyasiya Məhkəməsinin qərarının ləğv edilməsini, işin yenidən apelyasiya instansiyasında araşdırılmasını, ona ağır cəza təyin olunmasını istəyib.

Prokurorun protesti araşdırılması üçün Ali Məhkəməyə göndərilib. Hakim Əli Seyfəliyevin sədrliyi ilə baş tutan prosesdə kasasiya protestinin dəlilləri araşdırılıb, sonda protestin təmin edilməməsi barədə qərar qəbul edilib.

Qeyd edək ki, Novruz Orduxanlı Bütöv Azərbaycan Xalq Cəbhəsi Partiyasının (BAXCP) sədr müavini Niyaməddin Orduxanlının qohumudur.

Xatırladaq ki, həbsdən azad olunandan sonra Novruz Orduxanlı silah-sursatla da saxlanılmışdı.
Tarix: 12-08-2020, 13:22
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı