Ağsu aşırımındakı kafe və çayxanaları dağıdırlar - Fotolar

Ağsu aşırımındakı yolun kənarında fəaliyyət göstərən kafe və digər iaşə obyektlərini sökürlər.

Reyting.az-ın əldə etdiyi məlumata görə, bir qrup məmur uzun illərdir kiçik sahibkarlıqla məşğul olan insanların əziyyətlə qurduğu bu obyektləri ciddi əsas olmadan dağıtdırır. 20-30 ilə başa gələn bu kafe, pavliyon, çayxana və pivə evləri bir saat ərzində yerlə yeksan edilir.

Xatırladaq ki, bir neçə il əvvəl də belə addım atmaq istəyirdilər. Hətta sürüşmə təhlükəsi adı ilə aşırımda təmizləmə işi aparmaq planının olduğu deyilirdi. Ancaq sonradan yol təmiri işləri və kəskin döngələri düzəldib xırda kafe, çayxanlara dəyilmədi. İndi baş verənlərin səbəbi isə hələlik bəlli deyil. Əgər həqiqətən sürüşmə təhlükəsi varsa, bu zaman yüksək vəzifəli məmurların himayə etdiyi digər iaşə müəssisələri də sökülməlidir. Ancaq indi dağıdılan obyektlər kasıb əhaliyə məxsusdur. Ehtimal edilir ki, bu, hansısa məmurun aşırım və onun füsunkar mənzərəsinə “əl qoymaq” istəyindən qaynaqlanır.

Qeyd edək ki, aşırımdakı söküntü işlərinin davam etdirilməsi yüzlərlə inanın işsiz və çörəksiz qalması ilə nəticələnə bilər. Ən qəribəsi də budur ki, sökülən obyektlərin nə yeniləri ilə əvəzlənməsi tələb olunur, nə də qarşılığında konpensasiya verilir. Bu isə sosial narazılığı daha da artırır.

Ağsu aşırımındakı kafe və çayxanaları dağıdırlar - Fotolar