Bir tərəfdə quru çörək, digər tərəfdə zəngin süfrələr... Ramazanda sosial təzadların aynası

Ramazan ayı paylaşmaq, mərhəmət və bərabərlik ayı kimi qəbul olunur. Gün ərzində aclıq və susuzluğun hiss edilməsi insanlara ehtiyacı olanların vəziyyətini anlamağa kömək edir. Lakin iftar vaxtı gəldikdə cəmiyyət daxilindəki sosial fərqlər daha aydın görünür. Bir tərəfdə quru çörəklə orucunu açanlar, digər tərəfdə isə müxtəlif nemətlərlə dolu bahalı süfrələr arxasında iftar edənlər.
Bir çox ailələr üçün iftar süfrəsi olduqca sadə olur. Günün qazancı yalnız çörək, şorba və ya bir neçə xurma almağa yetən insanlar Ramazanı böyük səbir və təvazökarlıqla keçirirlər. Bəziləri üçün isə iftar təkcə fiziki ehtiyac deyil, həm də səbr və iman sınağıdır.

Sosial vəziyyəti çətin olan ailələrdə uşaqlar iftarı bəzən sadəcə çay və çörəklə açır. Buna baxmayaraq, onlar Ramazanın mənəvi dəyərini qorumağa çalışır, şükür və ümid hissini itirmirlər.

Digər tərəfdə restoranlarda və ya geniş ailə məclislərində təşkil olunan iftar süfrələri diqqət çəkir. Müxtəlif yeməklər, şirniyyatlar, meyvələr və ənənəvi təamlarla dolu masalar Ramazanın bolluq içində yaşanan tərəfini nümayiş etdirir.

Bəzi ailələr və şirkətlər iftar süfrələrini böyük miqyasda təşkil edir, yüzlərlə qonağı qəbul edir və bunu həm sosial status, həm də birlik nümayişi kimi təqdim edir.

Ramazan yalnız oruc tutmaq deyil, həm də empatiya qurmaq və paylaşmaq ayıdır. Sosial fərqlərin mövcudluğu reallıqdır, lakin bu ay insanları ehtiyacı olanlara daha çox diqqət göstərməyə çağırır.

Xeyriyyə aksiyaları, imkansız ailələrə ərzaq yardımı, kütləvi iftar süfrələrinin təşkili cəmiyyətdə həmrəyliyin gücləndirilməsi baxımından mühüm rol oynayır.

Ramazan bizə xatırladır ki, bolluq da, yoxsulluq da müvəqqətidir. Əsas olan paylaşmaq, mərhəmətli olmaq və ehtiyacı olanlara əl uzatmaqdır. Bir nəfərin süfrəsindəki artıq nemət başqa bir ailənin iftar sevincinə çevrilə bilər.

Bu müqəddəs ay cəmiyyətə sadə bir mesaj verir ki, iftar süfrəsinin zənginliyi yeməklərin çoxluğu ilə deyil, paylaşma ruhu ilə ölçülür.

Bizimyol.info