Bizimkilərin nəinki istefa, heç üzr istəmək niyyətləri də yoxdur
 
Bu, çoxqatlı adlanan hekayədir. Bəli, Qax bölgəsindəki Acınohur qoruğu ərazisində baş verənlər, kökü çoxdan  kəsilməli olan bir çox məsələləri yenidən görməyə kömək etdi. Xatırlatmaq istərdim ki, hər şey “Ekofront” ekoloji hərəkatının sosial şəbəkələrdəki səhifələrində ekofəalların qoruma bölgəsi adlandırdığı ərazidə ov zamanı əldə etdikləri kuboklarla poz verən ərəblərin fotoşəkillərini yayması ilə başladı.
 
Xüsusi hiddəti ərəblərdən birinin ov edərkən vurduğu bir Qafqaz durnası ilə qürurla çəkdirdiyi bir fotoşəkil doğurdu. Bu quş nəsli kəsilmək üzrədir və Azərbaycanın “Qırmızı kitab”ına daxil edilib. Bu quşlardan ölkəmizdə 250-dən çoxunun qalmadığı və ən azı birinin ərəb ölkələrindən gələn qonaqlar tərəfindən ov qurbanı olduğu bildirilir. Azərbaycanda ərəblərin ov etmələrini nümayiş etdirən çox sayda foto və video görüntü da sosial şəbəkələrdə yayılıb.
 
Dərhal, bu münaqişə böyüməyə başlayan kimi nazirliklər və idarələr tərəfindən sevimli oyun başlandı - öz günahlarını inkar etmək. Və bu işin səs-küylü istefalara səbəb olmaması təəccüblü deyil. Təəccüblü deyil, çünki Azərbaycanda qalmaqallardan sonra nazirlərin könüllü istefası ənənəsi yoxdur. Bu baxımdan iki nümunə vermək istərdim.
 
Bu ilin fevral ayında Avstriyanın əmək, ailə və gənclər naziri Kristina Aşbaxer bir dissertasiya yazarkən plagiatda ittiham edildiyi üçün istefa etdi. Müstəqil ekspert Stefan Veber onu plagiatda günahlandırdı. Plagiatın ən azından Aşbaxerin 2020-ci ildə Bratislava Texniki Universitetində müdafiə etdiyi dissertasiyanın beşinci hissəsində olduğu söylənildi. İttihamçı müəllifin başqa mənbələrdən məlumatları adlarını çəkmədən köçürdüyünü və mənbə göstərmədən “Forbes” məqaləsini də tərcümə etdiyini dedi.
 
Kristina Aşbaxer 2006-cı ildə müdafiə etdiyi işdəki tezislərində bir plagiat olmadığını, ancaq ona “əsərlərini dürüst bir şəkildə yoxlamaq imkanı verilmədiyini” söylədi. Onun sözlərinə görə, plagiat ittihamlarından yalnız özü deyil, övladları da əziyyət çəkir. Buna görə “ailəsini qorumaq üçün” istefa etdi.
 

Hələ bir dissertasiya yaza bilən nazirləri tapmağın belə, müşkül olduğu Azərbaycanda bu hal mümkündürmü? Təəssüf ki, yox.

 
Tamam, oxucu deyəcək ki, bu, uzun müddətdir Avropa demokratiyası ənənəsi olan Avstriyadır. Razılaşıram və bu dəfə Monqolustanı nümunə gətirirəm. Ölkə, ümumiyyətlə Avropa deyil. Orada 19 yanvar tarixində sosial mediada koronavirus diaqnozu qoyulmuş bir qadının və yeni doğulmuş körpəsinin isti üst geyimi, ayaqqabısı və fərdi qoruyucu vasitələri olmadan Milli Yoluxucu Xəstəliklər Araşdırma Mərkəzinə aparıldığına dair bir video yayıldı.
 
Ölkədə ictimai narazılıq fırtınası baş qaldırdı. Nəticədə, 20 yanvarda Monqolustanın səhiyyə naziri Toqtmolyn Munkhsaikhan, həmçinin Baş nazirin müavini və Koronavirusla Mübarizə üzrə Dövlət Fövqəladə Komissiyasının rəhbəri Yangugiin Sodbaatar istefa verdiklərini açıqladılar. Ancaq bu da hamısı deyil. Monqolustanın Baş naziri Ukhnaagiin Xurelsux da istefaya getdi.
 
“Nazirlər Kabinetinin iki üzvü istefa qərarını verdi. Kabineti formalaşdırarkən hamısı ilə komanda şəklində işləməyi planlaşdırırdım. Bu səbəbdən Baş nazir olaraq məsuliyyəti öz üzərimə götürməli və cəmiyyətin tələblərini qəbul etməliyəm”, - deyə Xurelsux bəyan etdi.
 

Azərbaycanda da geniş ictimaiyyət ərəblərin nadir quşları ov etməsi ilə bağlı qalmaqaldan narazı qaldı. Ancaq ölkəmizdə heç kim istefa etmədi.

 
Baxmayaraq ki, ərəblər üçün lisenziya, hər hansı digər ovçu kimi Ekologiya və Təbii Sərvətlər Nazirliyi tərəfindən verilir, bu Nazirliyin rəhbəri Muxtar Babayev nəinki istefaya, heç bütün bu günlərdə baş verənlərə görə üzr istəməyə ehtiyac duymadı. Axı, bura Monqolustan deyil ki, bu qədər əhəmiyyətsiz səbəblərdən istefa edək.

Bu qalmaqallı iş çərçivəsində üzə çıxan daha bir xarakterə - fövqəladə hallar naziri Kəmaləddin Heydərova toxunaq. Camaat ərəb turistlərin onun qonağı olduğunu iddia etdi. O qədər ucadan iddia etdi ki, Fövqəladə Hallar Nazirliyinin, ümumiyyətlə susqun rəhbəri vəziyyəti şərh etmək qərarına gəldi.
 
“Azərbaycanda qanunsuz ovla məşğul olan ərəblərlə tanış deyiləm, onları tanımıram. Bu, mənim haqqımda yazanlan daha bir saxta xəbərdir. Yazsınlar. Mən onlara heç nə demirəm”, - deyə nazir bildirdi.
 
Və dediklərindən dərhal sonra sosial şəbəkələrdə K.Heydərovun dediklərini təkzib edən bir çox sübutlar yayıldı. Üstəlik “korrespondent.az” nəşri açıq şəkildə göstərdi ki, Fövqəladə Hallar Nazirliyinin rəhbəri ərəbləri Azərbaycanda ov etməyə dəvət etdiyini inkar etsə də, şəbəkədə nazirin ərəblərlə çəkdirdiyi bir şəkil üzə çıxdı.

“Bunların arasında xeyli sərvətə sahib olan Həmdan bin Məhəmməd bin Rəşid də var. Dubaylı Şeyx Məhəmməd bin Rəşid Əl Məktumun 19 övladından biridir. Həmdanla yanaşı, yaxın qohumları və dostları tez-tez Azərbaycana gəlirlər. Qonaqların ova gəlməsi, Dubay şahzadəsi və dostlarının bu günlərdə “Instagram” səhifələrində yerləşdirdikləri fotoşəkillərlə də sübut edilir. Fotoşəkillərdən görünür ki, qonaqlar Fövqəladə Hallar Nazirliyinin Azərbaycan bayrağı olan helikopteri ilə ova gedirlər. Şahzadənin dostlarından biri “Instagram” səhifəsində fövqəladə hallar naziri Kəmaləddin Heydərovla müxtəlif vaxtlarda çəkilmiş fotolarını paylaşdı”, - deyə sayt yazır.
 
Beləliklə, Fövqəladə Hallar Nazirliyinin rəhbərinin konkret dəlillər gətirərək yalan danışmağını isbatladılar. Ancaq istefa etməyi düşünmürdü belə. Daha nə! Ərəb ovçuları tərəfindən öldürülən hansısa quşlarla bağlı yaranan qalmaqallara görə istefa etmək?! Necə deyərlər, bişmiş toyuğun da güləməyi gəlir.
 
Nə deyirisiniz? Media qəzəblənib? K.Heydərov bir çox media sahibləri və redaktorları ilə ortaq bir dil tapmağı mükəmməl bilir. Xalq qəzəblidir? Yaxşı, bir müddət qəzəblənəcək və unudacaq. Amma Fövqəladə Hallar Nazirliyinin rəhbəri vəzifəsi qalacaq. Həm də statusu.
 

Baş verənlər göz qabağındadır. Nazirlərimiz tərəfindən ictimai fikrə tamamilə məhəl qoyulmaması açıq şəkildə ortaya çıxdı. Hansı ki, əslində başa düşüləndir. Axı, ictimai rəyi bank hesabına qoya bilməzsiniz. Ancaq ərəb ovçularından onminlərlə dollarla ölçülən böyük bir qazanc əldə edə bilərsiniz.

 
Və bütün bu hekayə 15-20 il əvvəl baş versəydi, hər şeyi susdurmaq daha asan olardı. Sadəcə ona görə ki, o zaman hər hansı bir məlumatın yayılma sürəti o qədər də geniş deyildi. İndi hər yerdən çəkə bilən pilotsuz təyyarələr dövründə hər hansı bir daxili nazir və ya oliqarxın, daha çox bir oliqarx-nazirin daşınmaz əmlakını lentə ala və sonra hamısını sosial şəbəkələr, “YouTube” vasitəsilə yaya bilərsiniz.
 
Yeri gəlmişkən, bütün bunlar, yeni həqiqətləri dərk etməmələri səbəbindən bütün keçmiş və hazırkı məmurların xalqın qulağına əriştə asmağa çalışarkən nəzərə alınmır. Və sonunda əlimizdə olan situasiyaya düşürük. Əlimizdə olanlarla isə, ərəb ovçuları ilə baş verən kimi, qalmaqallar hələ çox təkrarlanacaq...

---