Maskalarla bağlı qərar qüvvəyə mindi – Apteklərdə maska ajiotajı başladı

Ötən gün Prezident İlham Əliyev "İnzibati Xətalar Məcəlləsində dəyişiklik edilməsi haqqında" qanunu imzalayıb. Qanuna əsasən, maska taxılması tələb olunan yerlərdə qaydalara tabe olmayanlar cərimələnəcəklər. Sərəncam bu gündən etibarən qüvvəyə minib.

Bəs, maska taxılması ilə bağlı yeni qərar qüvvəyə mindikdən sonra apteklərdə vəziyyət necədir? Maska qıtlığı yaşanırmı və qiymətlərdə artım varmı?

Musavat.com-un əməkdaşı bu gün apteklərə yollanaraq satışda maska olub olmadığı ilə maraqlanıb. Daxil olduğumuz ilk aptekin əməkdaşı bildirib ki, satışda yerli istehsal olan maska yoxdur. Satışda ancaq xaricidən gətirilən maskalardır. Yerli maska gah gətirilir, gah da gətirilmir. Maskanın biri 35 qəpikdir. Filtirli maskalar da satışda var. Qiyməti 3 manat əlli qəpik və 13 manatdır”.

Digər iki aptekdə isə nə yerli, nə də xarici istehsal olan maskaya rast gəldik. Satıcılar bildirdi ki, ötən gündən etibarən maska satışı artıb. Bu gün isə sifariş versək də, hələ gətirilməyib. Gün ərzində satışda maskalarımız olacaq.

Yeri maskaya isə yalnız baş çəkdiyimiz dördüncü aptekdə rast gəldik. Yerli və xarici istehsal olan maskalar 30 qəpik idi. Filtirli maskalar isə 3050 manatdan başlayan qiymətlərlə satılırdı.

Bəs, maska taxılması tələb edilən məkanları hansılardır?

1.1. şəhərlərarası (rayonlararası) və şəhərdaxili (rayondaxili) sərnişindaşımada istifadə olunan nəqliyyat vasitələrində (avtobus, taksi, metro, dəmiryolu və s.);

1.2. bazarlarda, qapalı ictimai iaşə, ticarət və xidmət obyektlərində (həmin obyektlərdə göstərilən xidmət növündən asılı olaraq tənəffüs yollarını qoruyan fərdi vasitələrin çıxarılmasının zəruri olduğu hallar istisna olmaqla);

1.3. dövlət orqanlarının (qurumlarının) binalarında vətəndaşların qəbulu və vətəndaşlara xidmət üçün nəzərdə tutulan sahələrdə;

1.4. fiziki və hüquqi şəxslərə məxsus binaların müştərilərə xidmət göstərilməsi üçün istifadə edilən sahələrində;

1.5. açıq sahəli ofislərdə və istehsalat yerlərində;

1.6. tarix və mədəniyyət abidələri hesab edilən qapalı məkanlarda, ibadət yerlərində, elm və səhiyyə müəssisələrində, sosial, mədəniyyət və digər bu kimi qapalı obyektlərdə;

1.7. ictimai nəqliyyat dayanacaqlarında, bilet kassalarının, bankomatların (ATM) və ödəniş terminallarının, ticarət, iş və xidmət obyektlərinin qarşısında növbədə;

1.8. insanların toplaşdığı və yaxın təmasda olduğu açıq havadakı ictimai yerlərdə onlar arasında sosial məsafənin qorunmasının mümkün olmadığı digər hallarda.

Maska taxmayan şəxslərin nə qədər cərimələnəcəyi də bəlli olub. Belə ki, maska taxılması ilə bağlı tələbləri pozan fiziki şəxslər əlli manat məbləğində, vəzifəli şəxslər yüz manat məbləğində, hüquqi şəxslər iki yüz manat məbləğində cərimə edilir. Bir il ərzində bu tələblər təkrar pozularsa, fiziki şəxslər yüz manat məbləğində, vəzifəli şəxslər iki yüz manat məbləğində, hüquqi şəxslər dörd yüz manat məbləğində cərimə edilir.

Qeyd edək ki, aprelin 6-da Sumqayıt Kimya Sənaye Parkında “Bakı Tekstil Fabriki” MMC tərəfindən yaradılan tibbi maska istehsalı müəssisəsinin açılışı olub və yerli maskaların istehsalına başlanılıb.
Musavat.com