Məmur özbaşınalığı milli fəlakət həddinə çatıb - Bəyanat

Məmur özbaşınalığı milli fəlakət həddinə çatıb

Azərbaycanda məmur özbaşınalığı, saxtakarlığı, korrupsiya, rüşvətxorluq və dövlət əmlakının milyardlarla dollar məbləğində sistemli şəkildə mənimsənilməsi milli fəlakət həddinə çatıb.

Reyting.az xəbər verir ki, bu fikirlər Azərbaycan Liberal Partiyasının (ALP) bəyanatında yer alıb.

ALP bəyan edir ki, məmur özbaşınalığı səbəbindən Azərbaycanda milyonlarla insan işsiz qalıb, yoxsulluqla, aclıqla üzləşib, əhalinin yarısından çoxu bir parça çörək üçün ölkəni tərk edib.

Bəyanatda qeyd edilir ki, son zamanlar bir sıra rayon icra hakimiyyəti başçılarının həbs olunmasına baxmayaraq, başqalarının özbaşınalıqlarını əvvəlki qaydada davam etdirməsi bu faciənin əyani göstəricisidir və ölkəni qanlı sosial-siyasi partlayış həddinə çatdırıb. Cəmiyyətdə klassik inqilabi şərait yaranıb:

“Aşağıdan ictimai, yuxarıdan inzibati nəzarətin olmadığı mühitdə milyonlarla, milyardlarla dollar məbləğində əmlak oğurlanır. Gerizəkalı məmurlar xalqa qulluq etmək əvəzinə onu qula çevirir, “yuxarılara” tabe olmur və dövlətin varlığına belə öldürücü təhlükə yaradırlar”.

ALP hesab edir ki, ən yaxın zamanlarda ölkədə demokratik, köklü siyasi və iqtisadi islahatlar başlamasa, sözdə dövlət rəhbərinə qul sadiqliyi nümayiş etdirən oğru, korrupsioner və rüşvətxor məmurlar Azərbaycan dövlətini məhv edə bilərlər:

“Əgər iqtidar ölkədə həqiqətən islahatlar aparmaq niyyətindədirsə, təcili olaraq cəmiyyətə islahat müraciəti etməli, onunla geniş spektrdə məsləhətləşmələrə başlamalı, Konstitusiyaya dəyişikliklər edilməsi haqqında geniş ictimai müzakirələr keçirməli, referendum hazırlamalı, Milli Məclis deputatlarının sayı bir qədər artırmalı, çıxış yolu kimi yeni və ya heç olmasa, indiki deputatların qalması şərtilə əlavə parlament seçkilərinin keçirilməsinə dair inandırıcı addımlar atmalıdır”.

ALP bəyan edir ki, məmurların, nazirliklərin, komitələrin və rayon icra hakimiyyəti orqanlarının sayı kəskin şəkildə azaldılmalı, həqiqətən vicdanı və əlitəmiz islahatçı kadrlar vəzifələrə gətirilməlidir.

Partiya hesab edir ki, coğrafi və digər şərait nəzərə alınmaqla əhalisinin sayı 100 min nəfərdən az olan rayonlar başqa rayonlara və ya öz aralarında birləşdirilməli, bələdiyyələrin səlahiyyətləri artırılaraq yerli icra hakimiyyəti orqanlarına və onların nümayəndələrinə gerçək nəzarət edən geniş səlahiyyətli məclislərə çevrilməli, yerli məclislərə seçkilər keçirilməlidir.

“Ölkə yolayrıcındadır – köklü islahatlar, yoxsa xalqı, ölkəni və dövləti məhvə aparan qanlı xaos!.. Seçim iqtidarındır...”, - deyə ALP-nin bəyanatında qeyd edilir.
Tarix: 7-05-2020, 22:58
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı