Binanın qarşısında park edən vətəndaş niyə cərimələndi? – Şikayət araşdırma tələb edir

“Gundemxeber.com” saytının redaksiyasına Binəqədi rayonu, İbrahimpaşa Dadaşov 71 ünvanından müraciət edən vətəndaş Rəşad Nəsirov yol polisi tərəfindən ona tətbiq olunan cərimələrlə bağlı narazılığını bildirib. Onun sözlərinə görə, yaşadığı binanın qarşısında park etdiyi hər iki avtomobilinə heç bir əsas olmadan cərimə yazılıb.

Şikayətçinin bildirdiyinə görə, hadisə səhər saat 07:00 radələrində baş verib və bu, eyni ərazidə yol polisi əməkdaşının əsassız cərimə tətbiq etdiyi artıq ikinci haldır. Rəşad Nəsirov iddia edir ki, məsələ ilə bağlı etdiyi müraciətlərə baxmayaraq, yol polisi tərəfindən hər hansı ciddi araşdırma aparılmayıb.

Vətəndaş redaksiyamıza təqdim etdiyi şikayət ərizəsində qeyd edir ki, cərimənin tətbiq olunduğu ərazi səki deyil və avtomobillərin orada dayanmasına qadağa qoyulduğunu göstərən aydın nişanlar da yoxdur. Onun sözlərinə görə, əgər həmin ərazi həqiqətən dayanmanın qadağan olunduğu sahədirsə, bəs niyə yolda qırıq xətlər çəkilib və avtomobillərin ora daxil olması üçün şərait yaradılıb?

Rəşad Nəsirov sual edir ki, əgər bu ərazi qadağan olunmuş zonadırsa, o zaman yol infrastrukturu niyə məhz avtomobillərin həmin sahəyə daxil ola bilməsi üçün uyğun şəkildə qurulub. Onun fikrincə, bu vəziyyət sürücülər üçün anlaşılmazlıq yaradır və bəzən əsassız cərimələrin yazılmasına səbəb olur.

Şikayətçi qeyd edir ki, yaşadığı binanın qarşısında avtomobilini saxladığı üçün iki nəqliyyat vasitəsinə cərimə tətbiq olunub. O bildirir ki, həmin yerdə piyadalar üçün ayrıca səki mövcuddur və cərimənin yazıldığı ərazi isə səki hesab edilə bilməz.

Rəşad Nəsirov həmçinin cərimələrlə bağlı tərtib edilmiş protokollardan da şikayət edir. Onun sözlərinə görə, 77NK083 dövlət nömrə nişanlı avtomobilə tətbiq edilən EQ34370109 və 01BU527 dövlət nömrə nişanlı avtomobilə tətbiq edilən EQ34370110 nömrəli protokollar əsassızdır və onların yenidən araşdırılmasına ehtiyac var.

Şikayətçi məsələ ilə bağlı aidiyyəti qurumlar tərəfindən hərtərəfli araşdırma aparılmasını və qeyd olunan protokollara yenidən baxılmasını tələb edir. O, həmçinin şikayət ərizəsinə həmin ərazinin fotoşəkillərini də əlavə etdiyini bildirir və şəkillərin vəziyyəti aydın şəkildə göstərdiyini qeyd edir.

Məsələ ilə bağlı rəsmi qurumların mövqeyi isə hələlik məlum deyil. Ümid olunur ki, aidiyyəti qurumlar vətəndaşın müraciətini araşdıracaq və məsələyə hüquqi qiymət veriləcək.

Gundemxeber.com