Xəbər verdiyimiz kimi, ötən gün Sabunçu rayonunun icra başçısı Adil Vəliyevlə keçmiş deputat, iş adamı Hacı Qalib Salahzadə arasında insident yaşanıb.
Belə ki, sabiq deputatın 500 min manata aldığı bağ torpaq sahəsini əhatələyən hasar dağıdılıb. Hacı Qalib Salahzadənin sözlərinə görə, icra başçısı Adil Vəliyev şəxsən əraziyə gəlib və deyib ki, həmin ərazini sökür: "Mənə də deyir ki, sənin üstündən maşınla keçərəm".
Adil Vəliyev özü də açıqlamasında sabiq deputatı təhdid etdiyini etiraf edib: "Dedim ki, Hacı, mən buranı boşaltdıracağam, bura hasar çəkdirəcəyəm. Dedi ki, mən də o hasarı sökdürəcəyəm. O zaman da mən demişəm ki, belə etsən, mən də sənin üstündən maşınla keçəcəyəm".
Adil Vəliyevin bu açıqlaması sosial şəbəkə istifadəçiləri arasında müzakirə mövzusuna çevrilib.
Məsələ ilə bağlı "Unikal"a açıqlama verən psixoloq Rövşən Nəcəfov bildirib ki, istər vəzifəli, istərsə də vəzifəsi olmayan şəxsin başqasını təhqir və ya təhdid etməsi düzgün deyil:
"Ümumiyyətlə, stress insanın psixoloji halının nizamsızlığıdır. Düşünürəm ki, vətəndaşlarımız stressdən uzaq olmalı və dialoq şəklində problemləri həll etməlidirlər. Çox təəssüf ki, cəmiyyətimizdə insanlar empatiya qura bilmirlər. Problemin həllindən çox problemin daha da böyüdülməsi istiqamətində fikirlər səsləndirirlər.
Mütəxəssis olaraq müşahidə etmədən icra başçısı Adil Vəliyevin hər hansı psixoloji probleminin olduğunu deyə bilmərəm, amma hesab edirəm ki, insan stressin onun işinə və həyatına ciddi şəkildə mane olduğunu görürsə, belə olan halda psixi sağlamlıq üzrə mütəxəssisə müraciət etməlidir".
