Milli Şuranın üzvü, keçmiş deputat Gültəkin Hacıbəylinin cinayət məsuliyyətinə cəlb olunmasını tələb edən Leyla Arif özü məhkəmə iclaslarına gəlmir. Hacıbəyli və vəkili isə tələb edir ki, onun özü də mütləq məhkəmədə iştirak etsin.

Hacıbəylinin Facebook sosial şəbəkəsində müzakirələr zamanı onun ünvanına “separatçı” yazmaqla böhtan atdığını iddia edən Leyla Arif azərbaycanlı olsa da, Türkiyədə yaşayır. Hacıbəylinin vəkili Aqil Layıc dekabrın 16-da məhkəmədə bildirib ki, xüsusi ittiham qaydasında iddia qaldıran şəxs özü mütləq məhkəmədə iştirak etməlidir.

Leyla Arifin vəkili isə deyir ki, onun gəlməsinə ehtiyac yoxdur, çünki həm nümayəndə, həm də vəkil kimi onu təmsil edir.

Nəsimi rayon Məhkəməsinin hakimi Elməddin Hüseynov bu məsələni, ümumiyyətlə, baxılmamış saxlayıb. Hacıbəyli onun işinə Nəsimi rayon Məhkəməsində baxılmasına etiraz edib. Vəkili məhkəməyə bu haqda yazılı ərizə verib.

“Heç bir hüquqi əsası olmayan kağız parçası ilə…”

“Ötən illər ərzində bu məhkəmədə istər övladım, istərsə də özümlə bağlı yalnız qanunsuz, sifarişli qərarlar çıxarılıb. İndi də heç bir hüquqi əsası olmayan kağız parçası ilə barəmdə cinayət işi başlayıb. Dövlət Sərhəd Xidməti məhkəməyə arayış göndərib ki, ölkədə yoxam, amma mənsiz məhkəmə iclasları keçirilir, iş icraata götürülür. Mənim isə heç nədən xəbərim olmur”, – Hacıbəyli bildirib.

O vurğulayıb ki, Leyla Arifin şikayətçi olduğu müzakirələr Fuad Cəlilov adlı şəxsin yazdığı paylaşımın altında gedib. Həmin paylaşım isə bir neçə gün sonra silinib, hazırda mövcud deyil. Hacıbəylinin sözlərinə görə, onu mövcud olmayan bir şeyə görə cinayət məsuliyyətinə cəlb edirlər.

Xüsusi ittihamçının nümayəndəsi də təsdiqləyib ki, Hacıbəylinin iştirakı olmadan beş dəfə məhkəmə iclası keçirilib.

Etiraz bütövlükdə Nəsimi rayon Məhkəməsinə verildiyinə görə buna Bakı Apellyasiya Məhkəməsi baxıb qərar verməlidir. Bu üzdən məsələ qeyri-müəyyən vaxta qədər təxirə salınıb.

Azadlıq radiosu