Azərbaycan Dövlət Mədəniyyət və İncəsənət Universitetinin nəzdində Humanitar Kollecin şöbə müdiri Xəyalə Əhmədova və Kollecin lobarantı Hicran Cəfərova ilə direktor Nərmin Qaralova arasındakı məhkəmə çəkişməsi sona çatıb.

Bu barədə Bakupost.az -a danışan Xəyalə Əhmədova bildirib ki, ona töhmət verdiyi üçün kollecin direktorunu məhkəməyə verib:

“Biz 63 nəfər direktorun özbaşınalığına, müəllimlərlə ziyalı kimi yox, bazar adamı kimi danışmasına, kollecimizdə tədris prosesinin bərbad vəziyyətə salmasına görə Prezidentə müraciət ünvanlamışdıq. Məktub Qaralovaya çatandan sonra bizim qara günlərimiz başladı, bizi təhqir etməyə, hədə-qorxu gəlməyə başladı. Öz aralarında istintaq qrupu yaratdılar və bir-bir müəllimləri çağırıb, məktubu niyə yazdığımızı soruşurdular.

Azərbaycan Dövlət Mədəniyyət və İncəsənət Universitetinin rektoru Ceyran Mahmudovanın adına bir qrup müəllimlərdən izahat aldılar. Mən də dedim ki, biz şikayət vermişiksə, haradan dəvət edərlər gedib orada izahatımızı verərik. Siz niyə bizdən izahat alırsınız? Ondan sonra 2 nəfərə şiddətli, mənə də adi töhmət verildi.


Mən də bu töhmətin əsassız verilməsilə bağlı məhkəməyə müraciət etdim”.



Binəqədi Rayon Məhkəməsində işə baxıldıqdan sonra direktorun töhmətlə bağlı əmri ləğv edilib. Eyni zamanda məhkəmə qərar gəlib ki, Hicran Cəfəva da qanunsuz olaraq işdən çıxaılıb. Məhkəmənin qərar qəbul edib ki, H.Cəfərova dərhal işə bərpa olunmalıdır.


Qeyd edək ki, keçmiş Baş prokuror Zakir Qaralovun qohumu olan Nərmin Qaralova bir müddət əvvəl 67 müəllimin işdən çıxarılması barədə qərar qəbul edib. Onlara bildirilib ki, ya bir illik müqaviləyə qol çəksinlər, ya da işə buraxılmayacaqlar. Bundan narazı qalan müəllimlər isə ondan şikayət ediblər. Sonradan bəzi müəllimlər direktorun təkliflə razılaşmağa məcbur olublar. Digər müəllimlər isə işdə adı getsə də auditoriyaya buraxılmır.

Müəllimlərin bütün aidiyyəti qurumlara ünvanladıqları müraciətləri hələlik cavabsız qalıb.

---