“Fransadan Qarabağa erməni terrorçular gəlir” - Mübarizə indi başlayır


Heç mübaliğəsiz deyə bilərik ki, İkinci Qarabağ müharibəsində Azərbaycanın əldə etdiyi zəfər, o cümlədən Şuşa əməliyyatları indi ayrı-ayrı ekspertlərin diqqət mərkəzindədir. Bəlkə də, bir çox döyüş planları artıq tədqiqata cəlb olunub. Hər halda qələbəmiz yüksək qiymətləndirilir. Xüsusilə də türk hərbi ekspertlər bizi alqışlamaqdadırlar. Amma, əlbəttə, təkcə tərif yağdırmır, eyni zamanda qalan problemləri həll etmək istiqamətində tövsiyələrini, məsləhətlərini əsirgəmirlər.

- Odur ki, “Sherg.az”olaraq türk mütəxəssislərlə söhbətlərimizə davam edirik. Bu dəfəki müsahibimiz ehtiyatda olan polkovnik, ayrı-ayrı yerlərdə dəfələrlə uğurlu hərbi əməliyyatlar keçirmiş Mithat Işıkdır. O, suallarımızı ətraflı cavablandırıb:

-Azərbaycanın 44 günlük müharibədəki zəfərini necə qiymətləndirirsiniz?

- Azərbaycan ordusu otuz illik təlimin nəticəsində qısa vaxt ərzində Qarabağın kritik nöqtələrini ələ keçirdi. Əks-hücum əməliyyatları ilk həftələrdə sürətlə davam etsə də, sonradan yavaşlandı. Əslində temp düşməməli və daha çox yerlər azad edilməli idi. Xüsusi ilə Xankəndi- İrəvan yolu nəzarət altına alınmalı və İrəvanla əlaqə kəsilməliydi. Əməliyyatların uzanması təəssüf ki, Azərbaycanın əleyhinə oldu. Rusiya və Fransanın- xüsusilə Rusiyanın müdaxiləsini əvvəlcədən nəzərə almaq lazım idi. Ermənistan ordusu mühasirəyə alınaraq tam təslim edilməliydi. Beləliklə, həm də mülki əhalinin Qarabağı boşaltması təmin olunmalıydı. Və əslində Xocalı da “təmizlənməliydi”. Çünki oranın bizim üçün mənəvi əhəmiyyəti var. Ermənilərin soyqırımı törətdikləri Xocalı qüssəli qaldı, “üzü gülmədi”. Bütün bunlarla belə, Azərbaycan ordusunun qələbəsini alqışlayıram. Silahlı qüvvələr lazım gələni elədi. Xalq da orduya dəstək verdi. Ümumiyyətlə, istənilən müharibənin uğurlu bitməsi üçün siyasi güc, xalq birliyi və ordu şərtdir. Qarabağ müharibəsində bu birlik yarandı və zəfər qazanıldı.

- Qarabağdakı rus sülhməramlılarının fəaliyyəti barədə nə düşünürsünüz?

Ruslar erməniləri qoruyub, dəstəkləyəcək, onları regiona gəlməyə təşviq edəcəklər. Ruslar şəhərlərə, rayonlara, kəndlərə mümkün olduğu qədər çox erməni köçürməyə və öz planlarını həyata keçirməyə çalışacaqlar. Bunun qarşısını almaq üçün azərbaycanlılar ən qısa zamanda ata torpaqlarına yerləşməlidirlər. Həmçinin kiritik ərazilər Azərbaycan ordusunun nəzarəti altına alınmalı, nəzarət-keçid məntəqələri yaradılmalıdır. Təhlükəsizliyi təmin etmək məqsədilə polis postları qurulmalıdır. Xüsusilə Murovdağ daim nəzarətdə olmalıdır. Strateji kəndlərdə kənd xalqından ibarət silahlı qoruma qrupu yaradılmalı və terrorla mübarizə təlimləri verilməlidir. Belə bir təcrübə Türkiyədə də var. Və mütləq güclü kəşfiyyat xidməti təşkil edilməlidir.

- Bildiyiniz kimi, Qarabağda türk-rus birgə Monitorinq Mərkəzi fəaliyyətə başlayıb. Bundan sonra nələr dəyişəcək?

- Bu, ilk növbədə motivasiya və mənəvi dəstək xarakteri daşıyır. İkinci bir tərəfdən, rusların sərbəst hərəkətinin qarşısı alınacaq. Nəzərinizə çatdırım ki, Türkiyə şəxsi heyətinin rəhbərliyindən hər cür dəstək istənilə bilər. Xüsusilə ehtimal olunan lokal atışmalarda necə davranılmasına dair təcrübə mübadiləsi aparılmasını məqsədəuyğun hesab edirəm. Çünki əsas mübarizə indi başlayır. Fransada yetişdirilən erməni terrorçular bölgəyə daxil olmağa başlayıb. Ona görə əsla eyforiyaya qapılmamalı və gözümüzü dörd açmalıyıq.

- Xankəndi, Xocalının taleyi necə olacaq?

- Etiraf etmək lazımdır ki, ruslar Xankəndinin Ermənistanda qalmasını istəyirlər və bütün imkanları ilə buna çalışırlar. Xocalı isə bayaq da dediyim kimi, xüsusi əhəmiyyətlidir. Ona görə mütləq azad edilməlidir.

- Bəs Zəngəzur?

- Zəngəzur dəhlizinin açılması çox vacibdir. Fikrimcə, ən qısa zamanda Bakı-Naxçıvan-Türkiyə- Qarabağ xətti üzrə yolun inşası başladılmalıdır. Ruslara güvənmək olmaz. Onu da deyim ki, mövcud vəziyyət İranı da narahat edir. İran hər ötən gün Azərbaycanın əleyhinə olacaq. Çünki dünyada siyasi proseslər sürətlə dəyişir.

- Qarabağdakı erməni silahlıları təhlükəsizliyi təhdid edir. Bu problemi necə həll edə bilərik?

-Əlbəttə, ilk fürsətdə onlar zərərsizləşdirilməlidirlər. Ümumiyyətlə, Azərbaycan ordusu davamlı təlimlər keçməlidir ki, hansısa özbaşınalıqda adekvat cavab vermək mümkün olsun.

- Sizcə, yaxın gələcəkdə yeni müharibə başlaya bilər?

-Bunu bayaq da dedim: lokal xarakterli atışma ehtimalı hər zaman olacaq. Ona görə də bölgədə təhlükəsizliyi gücləndirmək, mümkün qədər koordinasiyalı çalışmaq lazımdır.
Tarix: 3-02-2021, 00:00
Xəbəri paylaş


Xəbər lenti

Gündəm

Əyalət

Siyasət

Cəmiyyət

Hadisə

Şou biznes

Sosial

İdman

Sağlamlıq

Maraqlı

Maraqlı